ជាការពិតណាស់ កន្លងមកអ្នកលេងបណ្តាញសង្គមហ្វេសប៊ុកនិយមតាមដានអ្នកគ្រូហុងស៊ុយ ណាលី ច្បាស់ជាបានជ្រាបហើយ អ្នកគ្រូរមែងជម្រាបពីរឿងហុងស៊ុយ និង គំនិតល្អៗ ចំណេះដឹងផ្សេងៗដល់មហាជន។
យ៉ាងណាមិញ កាលពីយប់ថ្ងៃទី ២៩ ខែកក្កដា ឆ្នាំ ២០២៥ កន្លងទៅ អ្នកគ្រូបានបង្ហោះសំណេរវែងអន្លាយ ទៅកាន់ជនជាតិថៃ ៣ រូប គឺតារាថៃ Aum និង ពិធីករ Num Kanchai ក៏ដូចជា Sorrayuth ដែលជាបុគ្គលមានចំណេះដឹងដែរ តែផ្សាយព័ត៌មានបំផ្លើសលាបពណ៌ប្រទេសកម្ពុជា។
សំណេរនោះ អ្នកគ្រូ ណាលី រៀបរាប់ថា៖ «ខ្ញុំចង់ឱ្យ ៣ នាក់នេះ មកយកព័ត៌មានដោយផ្ទាល់នៅព្រំដែនខាងខ្មែរ ហើយថតយកសកម្មភាពជាក់ស្តែងដោយខ្លួនឯង ដើម្បីយកទៅផ្សព្វផ្សាយព័ត៌មាន ថាតើអ្នកណាបំពានអ្នកណាមុន អ្នកណាបាញ់អ្នកណាមុន អ្នកណាមិនគោរពច្បាប់ សូមមកថតយកសកម្មភាពដោយខ្លួនឯងឱ្យច្បាស់ហើយចាំយកទៅផ្សាយព័ត៌មាន ដើម្បីកុំបំផ្លើសផ្សាយព័ត៌មានលាបពណ៍ប្រទេសកម្ពុជា ទាំងឥតកេរ្តិ៍ខ្មាស់បែបនេះទៀត។
កន្លងមកខ្ញុំគិតថាអ្នកទាំង ៣ នេះ មានវិជ្ជាជីវៈល្អ ជាពិសេស Aum ដែលកន្លងមកមានអត្តចរិតថ្លៃថ្នូរ មានចិត្តមេត្តា តែខ្ញុំមិននឹកស្មានថាមនុស្សដូចពួកអ្នកភ្លើឱ្យពួកអាទាហានបោកបានបែបនេះទេ ឬមួយក៏អ្នកដឹងរឿងច្បាស់ហើយតែធ្វើភ្លើ ធ្វើខ្វាក់ភ្នែក នៅតែនិយាយបំពាន លាបពណ៌គេទៀត!
តែបើសិនជាអ្នកដឹងរឿងពិតហើយ នៅតែនិយាយបំពាន ខ្ញុំក៏សុំឱ្យព្រលឹងបុព្វបុរសខ្មែរ ដូនតាខ្មែរ ដែលសាងប្រាសាទកាច់បំបាក់កពូជរបស់អ្នក ដែលជាមេទាហាន និង សូមឱ្យពួកអាឈ្លានពានប្រទេសកម្ពុជាទាំងអស់ វិនាសអន្តរាយ ចាប់ពីថ្ងៃនេះតទៅ។ កម្ពុជាមិនដែលចង់បានរបស់អ្នកណា ឬបំពានអ្នកណាមុនទេ ដូច្នេះអ្នកណាជាអ្នកបំពានកម្ពុជាមុន សូមឱ្យអន្តរាយទាំងពូជ»៕
