ថ្មីៗកន្លងទៅនេះ មហាជនអ្នកគាំទ្ររបស់ពិធីការិនី សុភ័ក្រ្ត កុសុម៉ា បានផ្ទុះចាប់អារម្មណ៍ចែករំលែកនូវវីដេអូខ្លីៗដែលពិធីការិនីរូបនេះ បាននិយាយក្នុងកិច្ចសម្ភាសមួយ ចែករំលែកទាក់ទងនឹងរឿងរ៉ាវជិវីតសិល្បៈ ជាពិសេសបានលើកឡើងពីបុគ្គលសំខាន់ៗនៅក្រោយភាគជោគជ័យក្នុងវិថីសិល្បៈរបស់នាង។
ក្នុងនោះ អ្វីដែលធ្វើឱ្យមហាជនសរសើរខ្លាំងចំពោះពិធីការិនីរូបនេះ ខណៈនាងបានលើកនិយាយបង្ហាញការដឹងគុណដល់ពិធីកររូបសង្ហា តាប៊ុយ ដែលចាត់ទុកជាអ្នកមានគុណមួយរូបក្នុងជីវិតរបស់នាង ធ្លាប់ផ្ដល់ឱកាសក្នុងអាជីពពិធីករ និង ជាបុគ្គលដំបូងបំផុតបានឱ្យនាងក្លាយជាពិធីការិនីដ៏មានប្រជាប្រិយភាពមួយរូបមកដល់សព្វថ្ងៃ។
ក្រោយពីបានឃើញ ពិធីការិនី សុភ័ក្រ្ត កុសុម៉ា និយាយបង្ហាញការដឹងគុណនេះដែរ ងាកមើលពិធីករ តាប៊ុយ ក៏បានឃើញលោកបង្ហោះចែករំលែក និង ឆ្លើយតបទៅកាន់ កុសុម៉ា វិញដែរ ដោយលោកបានអរគុណ និង លើកសរសើរពីសមត្ថភាពរបស់នាង ព្រមបញ្ជាក់ថានាងទទួលបានជោគជ័យក៏ព្រោះតែសមត្ថភាព គឺដោយសារតែខ្លួននាងជាចម្បងផងដែរ។ លើសពីនេះ តាប៊ុយ ក៏បានសរសើរពីអត្តចរិតរបស់ កុសុម៉ា ជាមនុស្សមិនចេះគុំគួន គំនិតវិជ្ជមាន និង ឱ្យតម្លៃអ្នកដទៃទៀតផង។
ការបង្ហោះនោះ ពិធីករ តាប៊ុយ បានរៀបរាប់ថា ៖ «អរគុណដូចគ្នាបាទ ការងារមួយអាចជោគជ័យបានចាំបាច់ត្រូវមានមនុសល្អៗ ពូកែៗ ហើយក៏អរគុណគាត់ដូចគ្នា គឺគាត់មកជាមួយសមត្ថភាពគាត់ផ្ទាល់ គាត់ក៏ជាមនុស្សដែលធ្វើឱ្យពេញចិត្តឬអត់ ១ កាន់តែជោគជ័យ គាត់មានថ្ងៃនេះ ដោយសារតែខ្លួនគាត់ជាចំបង នៅជិតគាត់ទោះអ្នក depression ក៏បាត់អស់ដែរ ជូនពរគាត់កាន់តែជោគជ័យ»។ «មួយម៉ាត់យ៉ាងខ្លី support 1 លានភាគរយ មិនចេះគុំគួន… គាត់ជាមនុស្សគិត positive និង ឱ្យតម្លៃគេ បើនិយាយទៅយាយប៉ិ កុសុម៉ា នឹងគឺអូខេ»៕
