បើគិតមកដល់ពេលនេះ រយៈពេលប្រមាណជាងជិត ១ ឆ្នាំមកហើយ ដែលតារាចម្រៀងស្រីប្រចាំផលិតកម្មរស្មីហង្សមាស បានបង្ហាញមុខគូស្នេហ៍ជាសាធារណៈ គឺជាលោកប៉ូលិសរូបសង្ហាម្នាក់ បើគិតចាប់តាំងពីអំឡុងចុងឆ្នាំ ២០២៣ កន្លងទៅ។
បន្ទាប់ពីបើកចំហចំណងស្នេហ៍ភ្លាមៗ អ្នកគាំទ្រក៏តែងតែឃើញគូស្នេហ៍រូបសង្ហារបស់កញ្ញា សុខ សីឡាលីន បណ្តើរនាងទៅណាមកណាជុំគ្នាមិនដែលដាច់។ ជាពិសេសនោះ រាល់ពេលជួបជុំក្រុមគ្រួសារខាងស្រីម្តងៗ គឺមិនដែលបាត់វត្តមានខាងប្រុសនោះទេ។
យ៉ាងណាមិញ ស្រាប់តែប៉ុន្មានខែចុងក្រោយក្នុងឆ្នាំ ២០២៥ នេះ អ្នកគាំទ្រនិយមតាមដានជីវិតឯកជនរបស់កញ្ញា សុខ សីឡាលីន មិនសូវបានឃើញវត្តមានរបស់កញ្ញា សុខ សីឡាលីន និង គូស្នេហ៍ថតរូបជាគូទៀតនោះឡើយ ពោលគឺទាំងការបង្ហោះរូបភាពលើបណ្តាញសង្គមនានា ជាដើម។
ក្រោយមិនសូវឃើញការបង្ហោះរូបជុំគ្នានឹងមិត្តប្រុសជាប៉ូលិសសង្ហា កញ្ញា សុខ សីឡាលីន បានធ្វើឱ្យអ្នកគាំទ្រសង្ស័យថាចំណងស្នេហ៍អ្នកទាំង ២ បែកបាក់គ្នាក៏ថាបាន។ យ៉ាងណាមិញ រាល់ចម្ងល់ និង ការសង្ស័យក៏បានបញ្ចប់ ខណៈនៅថ្ងៃមង្គលការលោក ជី ដេវីត និង អ្នកនាង ទេព បូព្រឹក្ស គេបានឃើញកញ្ញា សុខ សីឡាលីន បណ្តើរគូស្នេហ៍ជាប៉ូលិសសង្ហាទៅចូលរួម បង្ហាញថាទំនាក់ទំនងរបស់អ្នកទាំង ២ នៅល្អូកល្អិនដូចដើម៕
