បើគិតមកដល់ពេលនេះ រយៈពេលជាង ៣ ឆ្នាំមកហើយ ដែលក្រុមចម្រៀង «Small World Small Band ក្រុមតូច» បានប្រកាសរំសាយក្រុមកាលពីដើមឆ្នាំ ២០២២ ក្រោយពីបានចាប់ដៃគ្នាលើវិថីសិល្បៈអស់រយៈពេល ៩ ឆ្នាំ។
ក្នុងនោះដែរ ក្រោយរំសាយក្រុមអស់រយៈពេល ៣ ឆ្នាំមកនេះ អតីតសមាជិកក្រុមទាំង ៤ រូប រួមមានកញ្ញា កេសរ, លោក ម៉ម ពេជ្ជរិទ្ធ, លោក រៀម សុខភិរម្យ និង លោក រ៉ុង សុភីដេវីដ បានបន្តចាប់ផ្តើមដំណើរជីវិតរៀងៗខ្លួន ដោយខ្លះបានបន្តដំណើរលើវិថីសិល្បៈទាំងស្រុងដូចដើម និង ខ្លះក៏ហាក់រយាលដូចគ្នាដែរ។
យ៉ាងណាមិញ ស្រាប់តែថ្មីៗនេះ អ្នកលេងបណ្តាញសង្គមហ្វេសប៊ុក ហាក់មានការភ្ញាក់ផ្អើលយ៉ាងខ្លាំង បន្ទាប់ពីឃើញការបញ្ចេញមតិមួយចំនួនរបស់កញ្ញា រិទ្ធី លំអរពេជ្រ ស្ថាបនិក ភ្លើងគុប និង ជាបងស្រីបង្កើតរបស់កញ្ញា កេសរ បានលើកយកឈ្មោះក្រុម «Small World Small Band ក្រុមតូច» មកនិយាយ។
ក្នុងការបញ្ចេញមតិមួយនៅលើផេករបស់ បុណ្យភូមិ ដោយ កញ្ញា រិទ្ធី លំអរពេជ្រ បានសរសេរថា៖ «នឹក Small World Small Band ក្រុមតូច»។ លើសពីនោះ នាងក៏បានបន្ថែមទៀតថា៖ «បើអាច Small World Small Band ក្រុមតូច សុំមួយ Album បានទេ?»។
ភ្លាមនោះដែរ ក្រោយឃើញការបញ្ចេញមតិរបស់ស្ថាបនិក ភ្លើងគុប យ៉ាងនេះហើយ អ្នកគាំទ្ររបស់ក្រុម Small World Small Band ក្រុមតូច បានបង្ហាញអារម្មណ៍រំភើប និង រង់ចាំមើលថា តើ Small World Small Band ក្រុមតូច នឹងវិលត្រឡប់មកវិញពិត ឬយ៉ាងណានោះ៕
