ដូចប្រិយមិត្តធ្លាប់បានដឹង សុខគា គីមលាង ឬហៅ កូនស្រមោច ក្រៅពីអាជីពសម្តែង និង បង្ហាញម៉ូដ នាងជានាដកាដ៏មានទេពកោសល្យ ដែលបានដុសខាត់ជំនាញច្បាស់លាស់ពីសាលាមធ្យមវិចិត្រសិល្បៈ។ អាជីពរបាំបាននាំនាងឆ្ពោះទៅសម្តែងដល់ក្រៅប្រទេសដូចជា ចិន ហុងកុង ថៃ វៀតណាម បារំាង និង ប៉ែកអឺរ៉ុបជាដើម។
ក្នុងនាមជានាដកាពោរពេញដោយជំនាញ និង បទពិសោធ នាងរមែងបង្ហាញឆន្ទៈអភិរក្ស និង ចែករំលែកសម្រាប់កូនខ្មែរជំនាន់ក្រោយផងដែរ។ ដូចថ្មីៗនេះ នាងបានបង្កើតមូលនិធិ ស្រមោចរាំ ព្រមជាមួយគោលបំណង ៣ សំខាន់ ដើម្បីសិល្បៈរបាំខ្មែរ។
តាមការសរសេរបង្ហោះនៅលើទំព័រហ្វេសប៊ុក សុខគា គីមលាង នាងបានលើកឡើងពីគោលបំណងយ៉ាងដូច្នេះថា៖ « Dancing Ant Foundation – មូលនិធិស្រមោចរាំ នាងខ្ញុំ សុខគា គីមលាង មានកិត្តិយស សូមជម្រាបជូនសាធារណៈជនឱ្យបានជ្រាបថា មូលនិធិស្រមោចរាំ ជាមូលនិធិ ដែលនាងខ្ញុំបង្កើតឡើងដោយផ្ទាល់ក្នុងគោលបំណងធំៗចំនួនបី ៖
១. ផ្តល់ការគាំពារ និង គាំទ្រយ៉ាងពេញទំហឹងក្នុងការទ្រទ្រង់ដល់ស្ថាប័ន ឬ ក្លឹបបង្ហាត់បង្រៀនសិល្បៈរបាំខ្មែរគ្រប់ទម្រង់ នូវសម្ភារ ឧបទេស គ្រឿងសម្រាប់តុបតែងកាយ សំពត់ អាវ ដូចដែលនាងខ្ញុំបាន និង កំពុងធ្វើដោយផ្ទាល់ជាច្រើនរួចមកហើយ។
២. ដើម្បីផ្តល់ជូននូវការអប់រំ និង ចំណេះជំនាញ បទពិសោធដែលនាងខ្ញុំមាន ក្រោមការហាត់រៀនយ៉ាងស្ទាត់ជំនាញពីសាលាមធ្យមវិចិត្រសិល្បៈ ទៅកាន់អ្នកបន្តវេនជំនាន់ក្រោយ តាមរយៈការបង្ហាត់បង្រៀនដោយផ្ទាល់ពីរូបនាងខ្ញុំ និង លោកគ្រូអ្នកគ្រូដែលជាបង្គោលដ៏ឆ្នើមជាច្រើនរូបទៀត។
៣. ដើម្បីរៃអង្គាសមូលនិធិ សាងសង់ទីកន្លែងសិក្សាអប់រំ ចំណេះជំនាញជូនដល់បងប្អូន លោកគ្រូ អ្នកគ្រូ ដែលស្ថិតនៅតំបន់ទីដាច់ស្រយាល និង ចូលរួមរាល់កិច្ចការងារសង្គម ដែលកំពុងត្រូវការ។
ដើម្បីជាការចែករំលែក ការផ្តល់ឱ្យនូវឱកាស និង ក្តីសង្ឃឹម ជាពិសេសបងប្អូនអ្នកដែលស្រលាញ់ ចង់ថែរក្សា ហាត់រៀនសិល្បៈរបាំបុរាណខ្មែរ ដែលជាកេរមរតកដ៏មហាសាលរបស់ដូនតាខ្មែរ ឱ្យបានគង់វង្ស និង រស់រវើកគ្រប់ជំនាន់តរៀងទៅ។ ជាពិសេសការផ្តល់ឱកាសប្អូនៗ ដែលរស់នៅតំបន់ដាច់ស្រយាលក៏អាចមានឱកាសទទួលបានការហាត់រៀន នឹងស្មើមុខស្មើមាត់ក្នុងការកសាង ខឿនវប្បធម៌ អរិយធម៌ជាតិឱ្យកាន់តែល្បីរន្ទឺ។
សូមចូលរួមជាមួយខ្ញុំដើម្បីកសាងអ្នកបន្តវេនដ៏មានគុណភាព និង ឧត្តមភាពជូនមាតុប្រទេសរបស់យើង»៕
