មហោស្រព «បុណ្យភូមិ» សប្តាហ៍ទី ១ បានរៀបចំរួចរាល់ទៅដោយរលូនកាលពីថ្ងៃទី ០៥ និង ទី ០៦ ខែមេសា ឆ្នាំ ២០២៥ កន្លងទៅ នៅផ្សារទំនើប ជីប ម៉ុង ២៧១ មេហ្គា ម៉ល ដោយសប្តាហ៍ទី ១ នេះ បាននាំមកនូវភាពទាក់ទាញជាច្រើនដល់អ្នកស្រុកមកលេងបុណ្យភូមិ ដូចជាការលេងល្បែងប្រជាប្រិយជាច្រើនរួមមាន វាយក្អម ទាញព្រ័ត្រ ដណ្តើមស្លឹកឈើ ជាដើម។
អ្វីដែលឆក់យកបេះដូងអ្នកទស្សនាកាន់តែខ្លាំងនាយប់ថ្ងៃទីមួយ ពោលគឺនៅថ្ងៃទី ០៥ ខែមេសា ឆ្នាំ ២០២៥ នោះគឺ អ្នកស្រុកបុណ្យុភូមិបាន ក្រាលកន្ទេលមើល ល្ខោន និង បានស្គាល់ច្បាស់ថាអ្វី ទៅជាល្ខោនយីកេជនជាតិកួយ ដោយឆាកមហោស្រព «បុណ្យភូមិ» ឆ្នាំទី ១២ នេះ គឺជាឆាកធំដំបូងបំផុត ដែល ល្ខោនយីកេជនជាតិកួយ បានសម្តែងរឿង «ព្រះលក្ខិសនវង្ស»។
គួរឱ្យដឹងថា ល្ខោនយីកេជនជាតិកួយ ប្រចាំតំបន់នៃខេត្តកំពង់ធំនេះ គឺមានវាសនាមិនខុសពី ល្ខោនដទៃទៀតឡើយក្នុងសម័យសង្គ្រាម គឺត្រូវបានរងការបំផ្លិចបំផ្លាញអស់ស្ទើរតែទាំងស្រុង ទាំងធនធានមនុស្ស ទាំងចម្រៀង សាច់រឿងជាភាសាកួយ ព្រមទាំងក្បាច់រាំផងដែរ។
សព្វថ្ងៃនេះ ក្រុម ល្ខោនយីកេជនជាតិកួយ មានសមាជិកប្រមាណ ២៧ នាក់ ដែលជាចំនួនមួយច្រើនគួរសម ប៉ុន្តែក្រុមល្ខោននេះ នៅតែជួបប្រទះនឹងកង្វះទីផ្សារនៃការសម្តែង ដោយកន្លងមកក្រុមល្ខោននេះ បានចេញសម្តែងភាគច្រើនតែនៅក្នុងភូមិស្រុក និង ធ្លាប់សម្តែងនៅរាជធានីភ្នំពេញចំនួន ៣ ដង តែប៉ុណ្ណោះ។
ដោយឡែក ក្នុងរាត្រីថ្ងៃទីមួយ នៃមហោស្រព «បុណ្យភូមិ» សប្តាហ៍ទី ១ អ្នកស្រុកបុណ្យភូមិក៏បានទស្សនានូវល្ខោនស្រមោលស្បែកធំ ដែលជាការសម្តែង ដោយសមាគម សិល្ប:សុវណ្ណភូមិ ក្នុងរឿងរាមកេរ្តិ៍ ដកស្រង់ត្រង់ឈុត «នាងបុញ្ញកាយ» ផងដែរ។ ក្នុងនោះ តាមរយ:ការបង្ហាញ ទម្រង់សិល្ប:បុរាណខ្មែរទាំងពីរទម្រង់នេះ ធ្វើឱ្យមហាជនច្រើនកុះករ បានស្គាល់នូវទម្រង់សិល្ប:ខ្មែរ សមស្រប ទៅនឹងទិសដៅបុណ្យភូមិ ដែលធ្វើឡើងក្រោមប្រធានបទ «សម្បត្តិបេតិភណ្ឌអរូបិយ ដែលត្រូវការការពារជាបន្ទាន់»។
សូមបញ្ជាកក់ថា បុណ្យភូមិនៅជួបគ្នាជាថ្មីម្តងទៀតនូវសប្តាហ៍ទីពីរ នៅថ្ងៃទី ១១ ដល់ ថ្ងៃទី ១២ ខែមេសា ឆ្នាំ ២០២៥ នៅវត្តស្វាយអណ្តែត ដោយមានការលេងល្បែងប្រជាប្រិយ និង មានការស្លៀកក្បិនក្រាលកន្ទេលមើលល្ខោន ដូចជាល្ខោនខោលវត្តស្វាយអណ្តែត ល្ខោនយីកេ នីពេជខេត្តកំពង់ធំ លោ្ខនពោលស្រី និង ទម្រង់សិល្ប:ជាច្រើន៕
