បើគិតមកដល់ពេលនេះ រយៈពេល ១៦ ឆ្នាំហើយ ដែលតារាកំប្លែង នាយ ពាក់មី បានឈរជើងលើវិថីសិល្បៈ។ ក្រោយពីបានចូលប្រកួតប្រឡងកំប្លែងនៅស្ថានីយទូរស្សន៍ CTN កាលពីឆ្នាំ ២០០៩ មកដល់បច្ចុប្បន្ន នាយ ពាក់មី បានអភិវឌ្ឍន៍ខ្លួនឯងយ៉ាងពេញទំហឹង ដោយក្រៅពីតារាកំប្លែងលោកក៏ជាតារាចម្រៀង តារាសម្តែង និង អ្នកដឹកនាំថែមទៀតផង។
ដោយឡែក មហាជនច្បាស់ជាបានស្គាល់ច្បាស់ហើយពីឈ្មោះពិតរបស់ នាយ ពាក់មី គឺមានឈ្មោះថា ចែម ចាន់រ៉ា ដែលជាឈ្មោះដាក់ឱ្យពីឪពុកម្តាយ ប៉ុន្តែនិយាយពីឈ្មោះក្នុងសិល្បៈ ពោលគឺឈ្មោះ ពាក់មី ឯណេះវិញ អាចនឹងមានអ្នកគាំទ្រតិចណាស់បានដឹងថាឈ្មោះនេះ តើអ្នកណាជាអ្នកដាក់ឱ្យ?
យ៉ាងណាមិញ ថ្មីៗនេះ នាយ ពាក់មី បានទម្លាយឱ្យដឹងថា ឈ្មោះ «ពាក់មី» ដែលលោកបានប្រើអស់រយៈពេល ១៦ ឆ្នាំមកនេះ គឺតារាកំប្លែងស្រីសម្ដីបាន អ្នកនាង សុខ ចាន់ធីតា ហៅ កាតុ ជាអ្នកដាក់ឱ្យ៕
