សិល្បករ និង បុគ្គលល្បីៗ ប្រកាសប្រាប់ពិភពលោកពីទង្វើគ្មានធម៌មេត្តារបស់ថៃ លើកដៃប្រ-ហារពលរដ្ឋស្លូតត្រង់កម្ពុជាឱ្យស្ល-ា/ប់ និង របួស

ជារឿងដ៏ឈឺចាប់បំផុតជាថ្មីរបស់កម្ពុជា កាលពីរសៀលថ្ងៃទី ១២ ខែវិច្ឆិកា ឆ្នាំ ២០២៥ ឯកឧត្តម នេត ភក្ត្រា រដ្ឋមន្ត្រីក្រសួងព័ត៌មានបានបង្ហោះវីដេអូជាមួយសារឱ្យបានដឹងថា ទាហានថៃបានប្រើកាំភ្លើងបាញ់ប្រហារចូលដែនអធិបតេយ្យកម្ពុជា បណ្ដាលឱ្យពលរដ្ឋមួយចំនួនរងរបួសនៅភូមិព្រៃចាន់។

ក្នុងនោះ តាមរយៈការឱ្យដឹងចុងក្រោយពី ឯកឧត្តម នេត ភក្ត្រា រដ្ឋមន្ត្រីក្រសួងព័ត៌មាន នៅយប់ថ្ងៃដដែល បានបញ្ជាក់បន្ថែមទៀតថា ថៃបានបើកការបាញ់ប្រហារពីរលើកមកលើពលរដ្ឋកម្ពុជាស្លូតត្រង់ នៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ គឺនៅម៉ោងប្រមាណ ៤ ល្ងាច និង ម៉ោង ៥ និង ៥៤ នាទីល្ងាច ថ្ងៃទី ១២ ខែវិច្ឆិកា ឆ្នាំ ២០២៥ ដោយបង្កឱ្យពលរដ្ឋខ្មែរបាត់បង់ជីវិតម្នាក់ និង របួស ៣ នាក់។

ងាកទៅមើលលើបណ្តាញសង្គមហ្វេសប៊ុកវិញ ក្រោយទាហានថៃបានប្រើកាំភ្លើងបាញ់ប្រហារចូលដែនអធិបតេយ្យកម្ពុជា នៅភូមិព្រៃចាន់ហើយនោះ មានបុគ្គលល្បីៗលើបណ្តាញសង្គម រួមមានសិល្បករ សិល្បការិនី និង អ្នកផលិតមាតិកាជាតិ អន្តរជាតិជាច្រើន បានធ្វើការបង្ហោះសារ និង វីដេអូបង្ហាញពីស្ថានភាពរបស់កម្ពុជា ដែលប្រទេសថៃបានធ្វើការឈ្លានពានមកកាន់កម្ពុជាជាថ្មី។ ក្នុងនោះ គេឃើញមាន តារាចម្រៀងរ៉េប វណ្ណដា និង សិល្បករ សិល្បការិនីរបស់ផលិតកម្មបារមី, ឧកញ៉ា ព្រាប សុវត្ថិ, លោក ខាត់ ជេមស៍, បវរកញ្ញា ប៊ី សុធារី និង អ្នកផលិតមាតិកាល្បីៗជាច្រើនទៀត។

លើសពីនោះ ក៏រួមមានលោក Chris អ្នកផលិតមាតិកាអន្តរជាតិដ៏ល្បី ដែលមានបណ្តាញសង្គមឈ្មោះ Travelwithchris ក៏បានចេញមកបង្ហាញការពិតពីកម្ពុជាទៅកាន់ពិភពលោកដែរ៕