មហាជននិយមតាមដានសង្គមហ្វេសប៊ុក ជាពិសេស រឿងរ៉ាវពាក់ព័ន្ធតារាភេទទី ៣ Noudy Singer ច្បាស់ជាបានជ្រាបហើយពីករណីគ្រោះថ្នាក់ចរាចរណ៍របស់សិល្បកររូបនេះ កាលពីរាត្រីថ្ងៃទី ០៥ ខែកញ្ញា ឆ្នាំ ២០២៥ វេលាម៉ោង ១១ និង ៣០ នាទីយប់ ដោយ មានបុរសមួយរូបជិះម៉ូតូមួយគ្រឿងយ៉ាងលឿនមកប៉ះនឹងម៉ូតូ Noudy និង បណ្តាលឱ្យបុរសរូបនោះបាត់បង់ជីវិត តាមបណ្ដោយផ្លូវក្រោមស្ពានជ្រោយចង្វារ ក្នុងសង្កាត់ជ្រោយចង្វារ ខណ្ឌជ្រោយចង្វារ រាជធានីពេញ។
បើតាមប្រភពនៅកន្លែងកើតហេតុបានឱ្យដឹងថា បុរសរងគ្រោះ ដែលបានស្លាប់នោះ គឺជាអ្នកជិះម៉ូតូលឿនមកបុកម៉ូតូរបស់ Noudy ខណៈ តារាភេទទី ៣ រូបនេះ ជិះយឺតៗតាមបណ្តោយផ្លូវ។ យ៉ាងណាក៏ដោយ បើទោះជាជនរងគ្រោះជាអ្នកមកបុក Noudy ក្តី តែ Noudy ក៏ត្រូវសមត្ថកិច្ចឃាត់ខ្លួនទៅកាន់ប៉ុស្តិ៍ ស្ថិតក្នុងសង្កាត់ជ្រោយចង្វារ ខណ្ឌជ្រោយចង្វារដែរ។
ខណៈ កំពុងស្ថិតនៅក្នុងការឃាត់ខ្លួននោះដែរ លោក Noudy ក៏បានបង្ហាញជំហររបស់ខ្លួន ដោយបានបង្ហោះសារនៅលើគណនីហ្វេសប៊ុកលោកថា៖ «ខ្ញុំប្រកាន់ជំហរ ថាខ្ញុំមិនបានខុស ទោះជាមានរឿងអ្វី ក៏ខ្ញុំមិនខ្លាច ខ្ញុំនឹងប្រឈមមុខ»។
ក្នុងនោះដែរ ក្រោយឃើញ លោក Noudy ជួបរឿងហេតុខាងលើនោះហើយ គេបានឃើញមហាជនអ្នកគាំទ្រ ជាពិសេស សិល្បករ សិល្បការិនីជាច្រើន រួមមាន លោក ណុប បាយ៉ារិទ្ធ, កញ្ញា សុខ ពិសី និង មិត្តសិល្បៈច្រើនទៀត បានចូលទៅជូនពរដល់ Noudy និង សង្ឃឹមថា Noudy នឹងស្វែងរកយុត្តិធម៌បានចេញពីការឃុំខ្លួនបណ្តោះអាសន្ន៕
