សិល្បករជាច្រើនស្ម័គ្រចិត្តថតរឿង «សោកនាដកម្មភ្នំខ្មោច» ដោយមិនយកកម្រៃ ធ្វើឱ្យលោក លៀក លីដា លើកឡើងទាំងអួលទៅវិញ

ថ្មីៗនេះ អ្នកលេងបណ្តាញសង្គម ជាពិសេស អ្នកស្នេហាវិស័យភាពយន្តច្បាស់ជាបានជ្រាបមកហើយ ពីការប្រកាសជ្រើសរើសតួសម្តែងក្នុងការផលិតភាពយន្តខ្នាតធំថ្មីរបស់ផលិតកម្ម LD គឺរឿង «សោកនាដកម្មភ្នំខ្មោច» ដែលបានដកស្រង់ចេញពីសៀវភៅ «ភ្នំដងរែក ទីពុំអាចភ្លេច» ជាការនិពន្ធ និង ជារឿងពិតរបស់អ្នកឧកញ៉ាវេជ្ជបណ្ឌិត គួច ម៉េងលី ស្ថាបនិក ប្រធានក្រុមប្រឹក្សាភិបាល និងជាអគ្គនាយកប្រតិបត្តិ នៃក្រុមហ៊ុន ម៉េងលី ជេ. គួច អេឌ្យូខេសិន។

ក្នុងនោះ ក្រោយការប្រកាសស្វែងរកតួសម្តែង ផលិតកម្ម LD ក៏បានឱ្យដឹងថា មានអ្នកដាក់ពាក្យខ្ទង់ម៉ឺននាក់ បានចុះឈ្មោះថែមទៀតផង។ យ៉ាងណាមិញ កាលពីថ្ងៃទី ០៣ ខែតុលា ឆ្នាំ ២០២៥ កន្លងទៅនេះ លោក លៀក លីដា ចាងហ្វាងផលិតកម្ម LD បានបង្ហាញអារម្មណ៍រំភើប ខណៈមានសិល្បករល្បីៗជាច្រើន បានស្ម័គ្រចិត្តចង់ចូលរួមសម្តែងភាពយន្ត «សោកនាដកម្មភ្នំខ្មោច» ដោយមិនយកកម្រៃ។

លោក លៀក លីដា បានបង្ហាញអារម្មណ៍ថា៖ «អ្នកមានលុយមិនប្រាកដថាមានចិត្ត អរគុណតារាល្បីៗ ដែលចង់ចូលរួមថតរឿង សោកនាដកម្មភ្នំខ្មោច ដោយមិនគិតលុយ ពិតជាអរគុណណាស់! តែយ៉ាងណាក៏ LD មិនឱ្យអត់ដែរ»៕