ជាការពិតណាស់ ពាក្យថាកម្មសិទ្ធិបញ្ញា ឬ ជាទូទៅមហាជនតែងតែប្រើពាក្យជាសាភាបរទេសថា Copyright ពិតជាមានសារសំខាន់ខ្លាំងណាស់ សម្រាប់ម្ចាស់ស្នាដៃនីមួយៗ ហើយក៏មានប្រយោជន៍ចំពោះអ្នកសិល្បៈផងដែរ។
ជាក់ស្តែង បច្ចុប្បន្នបញ្ហាចោទរបស់សិល្បករភាគច្រើនផ្នែកចម្រៀង តែងតែមានបញ្ហា Copyright នៅលើបណ្តាញសង្គម YouTube តែម្តង ដោយពេលខ្លះ បទរបស់ម្ចាស់ដើមត្រូវបានលុបចេញ ព្រោះហេតុផលជាប់ Copyright ខណៈការកូពី ឬ cover ខ្លះ បែរជាត្រូវរក្សាទុកទៅវិញ។
យ៉ាងណាមិញ ថ្មីៗនេះ អ្នកលេងបណ្តាញសង្គមកំពុងចាប់អារម្មណ៍ នឹងការចែករំលែករបស់សិល្បករផ្នែកចម្រៀង ភាគច្រើនជាតារាចម្រៀងរ៉េប បានបង្ហះសារយ៉ាងហួសចិត្ត ក្រោយឃើញគណនី Telegram មួយ រកស៊ីដក copyright ក្នុងតម្លៃ ២៥ ដុល្លារ។ ក្នុងនោះ រួមមាន លោក ទេព ពិសិដ្ឋ, តារាចម្រៀងរ៉េប NPN, សមាជិកក្រុម La Cima Cartel លោក Meezy24k តារាចម្រៀងរ៉េប Red Kingុ, ChaCha និង លោក J-Pok ជាដើម បានចែករំលែកសារយ៉ាងហួសចិត្ត ដែលពួកគេខិតខំផលិតបទចម្រៀងទម្រាំបានមួយបទៗ ប៉ុន្ដែបែរជាមានអ្នកយករឿងនេះមកធ្វើជាមុខជំនួញដោយមិនគិតជាម្ចាស់ស្នាដៃដើមទៅវិញ។
យ៉ាងណាមិញ អ្វីដែលកាន់តែហួសចិត្តនោះ គឺតារាចម្រៀងរ៉េប Red King ទើបតែចេញបទចម្រៀងថ្មី ស្រាប់តែជាប់ Copyright បាត់ ខណៈលោកគឺជាម្ចាស់បទនោះសោះ៕
