សិល្បករខ្មែររស់នៅក្រៅប្រទេសម្នាក់ គូរគំនូរមិនដែលចោលអត្តសញ្ញាណជាតិ កំពុងទទួលបានការសរសើរពីបរទេស

លោក​ ហ៊ុន សុភ័ក្ត្រ ត្រូវបានគេស្គាល់នៅលើបណ្តាញសង្គមថា Sopheak Art លោកគឺជាវិចិត្រករពហុជំនាញ កំពុងរស់នៅប្រទេសអូស្ត្រាលី។ លោកអាចគូរគំនូរច្រើនប្រភេទរាប់តាំងពីគំនូរលើក្រដាស គំនូរលើដងខ្លួន គំនូរលើម៉ូតូឡាន គំនូរលើជញ្ជាំង គំនូរឌីជីថល​(Digital Art) រហូតដល់ គំនូរជីវចល(Animation) ទៀតផង។ ថ្វីបើរស់នៅលើទឹកដីបរទេសក្តី ប៉ុន្តែរាល់ស្នាដៃដែលលោកបង្កើត តែងភ្ជាប់មកជាមួយអត្តសញ្ញាណខ្មែរ ដូចជាការគូរតួអង្គបុរាណខ្មែរ និង រូបបែបសហសម័យមានរំលេចក្បាច់ខ្មែរជាដើម។

ក្រឡេកមកដើមឆ្នាំនេះ លោកបានធ្វើឱ្យមហាជនលើបណ្តាញសង្គមផ្ទុះការចាប់អារម្មណ៍ខ្លាំង ដោយលោកបានបង្ហោះវីដេអូបង្ហាញពីការគូរគំនូររូបស្ត្រីពាក់មកុដអប្សរា ស្លៀកពាក់ក្នុងឈុតសម័យថ្មី អមរំលេចដោយក្បាច់ខ្មែរនៅលើដងខ្លួន។ អ្វីដែលសំខាន់ គំនូរនេះលោកគូរដោយប្រើឧបករណ៍បាញ់ពណ៌គំនូរ (Airbrush) មើលមកពិតជារស់រវើក ស្រស់ស្អាត ប្លែកមួយបែប។ លោកបានសរសេរបញ្ជាក់ដែរថា នេះជាគំនូរលើក្រណាត់ ហើយក៏ជាស្នាដៃដំបូងរបស់លោកបើកទំព័រឆ្នាំ ២០២៥ ផងដែរ។

ក្រោយការបង្ហាះស្នាដៃថ្មីនេះ ឃើញថាអ្នកប្រើប្រាស់បណ្តាញសង្គម ជាពិសេស ជនជាតិខ្មែររស់នៅបរទេស និង ជនជាតិបរទេសបានចាប់អារម្មណ៍ ក៏ដូចជាចូលទៅ Comment សរសើរជាហូរហែ។ អ្នកខ្លះក៏បានសួរលោកអំពីទីតាំងដើម្បីទៅជាវផ្ទាល់ផងដែរ។ បច្ចុប្បន្ន លោកមានស្ទូឌីយ៉ូផ្ទាល់ខ្លួននៅទីក្រុងស៊ីដនី ប្រទេសអូស្ត្រាលី។ មិនត្រឹមតែរូបអប្សរាខ្នាតផ្ទាំងដាក់តាំងនេះប៉ុណ្ណោះទេ កន្លងមកលោកបានបង្កើតស្នាដៃធំៗ ដូចជាគូរនៅលើជញ្ជាំង លើអគារ ជារូបបង្ហាញពីសិល្បៈវប្បធម៌ខ្មែរមានរបាំអប្សរា តួអង្គល្ខោនខោល និង ប្រាសាទព្រះវិហារជាដើម៕​

ចុចទីនេះដើម្បីទស្សនាវីដេអូ