សាលារៀនថៃ ជាប់ព្រំដែនមីយ៉ាន់ម៉ា ប្រកាសជម្លៀសសិស្សចេញភ្លាមៗ ក្រោយមានគ្រា./ប់ធ្លាក់ចូល ដោយសារក្រុមប្រឆាំងកំពុងប៉ះគ្នា

កាលពីថ្ងៃទី ២១ ខែវិច្ឆិកា ឆ្នាំ ២០២២ កន្លងទៅនេះ ស្ថានការណ៍នៅជាយដែនប្រទេសមីយ៉ាន់ម៉ា បានកើតការក្តៅគគុកជាថ្មី ដោយយោធាមីយ៉ាន់ម៉ា បានប៉ះគ្នាជាមួយក្រុមប្រឆាំងឧទ្ទាមមួយទំហឹង បណ្តាលឱ្យសាលារៀនថៃមួយនៅជាប់នោះ ត្រូវបង្ខំចិត្តជម្លៀសសិស្សចេញ។

តាមព័ត៌មានបានឱ្យដឹងថា ទាហានមីយ៉ាន់ម៉ាបានតទល់គ្នាយ៉ាងពេញទំហឹងជាមួយនឹងក្រុមប្រឆាំងឧទ្ទាម ដោយបានប្រើទាំងអាវុធធន់ធ្ងន់ និងអាវុធច្រើនប្រភេទទៀត។ ការតទល់នេះបានកើតឡើង នៅរដ្ឋការ៉ែន ទល់មុខស្រុកម៉ែសត ខេត្តតាក ប្រទេសថៃ ដែលនៅប្រមាណ ២ ទៅ ៣ រយម៉ែត្រពីសាលារៀនបានម៉ែកនកេនប៉ុណ្ណោះ ហើយក្នុងនោះ មានគ្រាប់កាំភ្លើងបានធ្លាក់យ៉ាងរប៉ាយទៅក្នុងសាលា ដែលបណ្តាលឱ្យអ្នកគ្រប់គ្រងសម្រេចចិត្តបិទសាលាចោលបណ្តោះអាសន្ន និងជម្លៀសកូនសិស្សប្រមាណ ៣៤៥ នាក់ចេញយ៉ាងប្រញាប់ផងដែរ។

យ៉ាងណាមិញ មកទល់ពេលនេះការតទល់គ្នារវាងក្រុមទាំងពីរនៅតែបន្តយ៉ាងក្តៅគគុក ហើយមានជនជាតិមីយ៉ាន់ម៉ាជាង ១០០ នាក់ហើយដែលបានរត់មកចូលក្នុងទឹកដីថៃ ដោយអាជ្ញាធរថៃក៏បានទទួលជួយបណ្តោះអាសន្ន។ ដោយឡែក ទាហានថៃ ក៏ត្រូវបានគេបញ្ជូនទៅពង្រាយដាក់នៅទីតាំងខាងលើ ដើម្បីថែរក្សាសុវត្ថិភាពផងដែរ៕

ប្រភព៖ Khaosod