កាលពីថ្ងៃទី ៦ ខែវិច្ឆិកា ឆ្នាំ ២០២៥ កន្លងទៅនេះ សារព័ត៌មាន Khaosod របស់ថៃ បានទម្លាយឱ្យដឹងថា ភាគីខាងថៃ បានត្រៀមដោះលែងទាហានកម្ពុជាទាំង ១៨ នាក់ ដែលពួកគេចាប់ខ្លួនយកទៅក្រោយពីបទឈប់បាញ់ចូលជាធរមាន ហើយបើគិតមកដល់ពេលនេះមានរយៈពេលជាង ៣ ខែហើយ។

តាមព័ត៌មាន Khaosod បានឱ្យដឹងថា នៅថ្ងៃទី ៦ ខែវិច្ឆិកា ឆ្នាំ ២០២៥ កន្លងទៅ កងទ័ពភូមិន្ទរបស់ថៃ បានទាក់ទងទៅមេបញ្ជាការការពារព្រំដែនខេត្តច័ន្ទបុរី និងត្រាត ដើម្បីសម្របសម្រួលរៀបចំទីតាំង និងកន្លែងស្នាក់នៅសម្រាប់ការដោះលែងទាហានកម្ពុជាទាំង ១៨ រូប នៅច្រកព្រំដែនផាក់កាត ស្រុកប៉ូងណាំរ៉ន ខេត្តចន្ទបុរី នៅថ្ងៃទី ១២ ខែវិច្ឆិកា ឆ្នាំ ២០២៥ ខាងមុននេះ។

យ៉ាងណាមិញ ខាងភាគីថៃ នៅមិនទាន់បានបញ្ជាក់ជាផ្លូវការ ឬតាមរយៈការទូតណាមួយឡើយចំពោះព័ត៌មានខាងលើនេះ៕
ប្រភព៖ Khaosod