ជាការពិតណាស់ ការបំផ្លិចបំផ្លាញនូវសម្ប្តត្តិបេតិកភណ្ឌពិភពលោក ប្រាសាទព្រះវិហារ ពីសំណាក់ទាហានថៃកាលពីពេលកន្លងមក បានធ្វើឱ្យប្រជាជនកម្ពុជាមានការឈឺចាប់យ៉ាងខ្លាំង ដោយប្រាង្គប្រាសាទដ៏ល្អផូរផង់ បែរជាមកខ្ទេចខ្ទីជាច្រើនកន្លែង ព្រោះការបាញ់ទម្លាក់គ្រាប់បែកពីការឈ្លានពានរបស់ថៃមកលើទឹកដីកម្ពុជា។
ក្នុងនោះដែរ ក្រឡេកទៅកាន់តារាចម្រៀង សាយ ដែលជាសិល្បករម្នាក់ តែងមានសកម្មភាពសប្បុរសធម៌នានានៅប្រាសាទព្រះវិហារនាពេលកន្លងមក បានបង្ហាញអារម្មណ៍យ៉ាងឈឺចាប់ ខណៈលោកបានឃើញរូបភាពកាលពីខែមុន ពោលគឺអំឡុងពេលរៀបចំកម្មវិធី Phreah Vihear Temple Run លើកទី ៣ កាលពីថ្ងៃទី ០៧ ខែកក្កដា ឆ្នាំ ២០២៥ កន្លងទៅ ដើម្បីអបអរសាទរប្រាសាទព្រះវិហារដាក់ចូលបញ្ជីបេតិកភណ្ឌពិភពលោកលើកទី ១៧។
លោក សាយ បានរៀបរាប់ថា៖ «ឃើញរូបប៉ុន្មានប៉ុស្តិ៍នេះហើយខ្ញុំ ស្រណោះប្រាសាទព្រះវិហារខ្មែរណាស់ ជួបសង្រ្គាមច្រើនលើកច្រើនសាដោយសារសម្រស់អ្នកស្អាតពេក ល្អឥតខ្ចោះពេកធ្វើឱ្យអ្នកជិតខាងចង់បានឡើងស្ទើរឆ្កួតទៅហើយ មានទាំងផ្តាំតកូន តចៅឱ្យដណ្តើមឱ្យបានទៀត។ ខ្ញុំមិនដឹងធ្វើអ្វីបានខ្លះទេដើម្បីចូលរួមថែរក្សាប្រាសាទព្រះវិហារ មានតែធ្វើតាមជំនាញ និង បង្កើតកម្មវិធីផ្សេងៗដើម្បីឱ្យជនរួមជាតិ និង បរទេសបានទៅដល់ទីតាំងផ្ទាល់ ដើម្បីជាសក្ខីភាព ព្រមទាំងបានឃើញពីអច្ឆរិយៈភាពនៃប្រាសាទនេះ។ ពេលនេះម៉ោងនេះ ខ្ញុំបានតែសូមបួងសួងដល់វត្ថុស័ក្ដិសិទ្ធិនៃព្រះរាជាណាចក្រកម្ពុជា សូមការពារប្រាសាទព្រះវិហារ និង បងៗកងទ័ពជួរមុខឱ្យសុខសុវត្តិភាព ពីការឈ្លានពាន និង ឈរជំទើតលើកំពូលភ្នំដងរែកជានិរន្តគង់វង្សជាមួយកម្ពុជា»៕
