ជាការពិតណាស់ កន្លងមកមហាជននិយមតាមដានការងារសិល្បៈ និង សង្គមរបស់លោក សាយ ច្បាស់ជាបានជ្រាបហើយថា ក្រៅពីការទទួលបានប្រជាប្រិយភាពក្នុងវិស័យសិល្បៈ តារាចម្រៀងកូនកាត់ខ្មែរ ឡាវ រូបនេះ ក៏ទទួលបានកេរ្តិ៍ឈ្មោះ និង ការកោតសរសើរពីប្រជាជនកម្ពុជាក្នុងការងារសប្បុរសធម៌របស់លោកជាច្រើន ជាពិសេស គឺក្នុងកម្មវិធី «Run With Sai»។
ក្នងនោះដែរ មិនត្រឹមតែការរត់ក្នុងកម្មវិធីជាច្រើនខាងលើនោះទេ តែ លោក សាយ ក៏បានរៀបចំកម្មវិធីសប្បុរសធម៌តាមរយៈសកម្មភាពនានាជាច្រើន ជាមួយនឹងមន្ទីរពេទ្យ សាលារៀន រដ្ឋាភិបាល និង អង្គការក្រៅរដ្ឋាភិបាលជាច្រើន ដើម្បីជួយដល់កុមារ និង អ្នកខ្វះខាតថែមទៀតផង។
យ៉ាងណាមិញ ថ្មីៗនេះ លោក សាយ ត្រូវបានមហាជនចាប់អារម្មណ៍លោកជាថ្មីម្តងទៀតហើយ ខណៈ លោកត្រូវបាន លោកជំទាវ ស្រូយ សុជាតិ អគ្គនាយកនៃអគ្គនាយកដ្ឋានយុវជន និង រាជរដ្ឋាភិបាលកម្ពុជាតែងតាំងធ្វើជាប្រធានប្រតិភូ ដឹកនាំប្រតិភូយុវជនកម្ពុជា ចូលរួមកម្មវិធី នាវាយុវជនអាស៊ីអាគ្នេយ៍និងជប៉ុន លើកទី ៤៩។ ក្នុងនោះ កម្មវិធី នាវាយុវជនអាស៊ីអាគ្នេយ៍និងជប៉ុន លើកទី ៤៩ នឹងចាប់ផ្តើមនៅដើមឆ្នាំ ២០២៦ ខាងមុខនេះ។
គួរបញ្ជាក់ថា លោក សាយ គឺជាយុវជនកម្ពុជាមួយរូប ដែលធ្លាប់បានចូលរួមកម្មវិធីនាវាយុវជនអាស៊ីអាគ្នេយ៍ កាលពីឆ្នាំ ២០១០ កន្លងទៅ។ ក្នុងនាមជាអតីតយុវជនវជនអាស៊ីអាគ្នេយ៍នេះផង និង ជាយុវជនកម្ពុជាមួយរូប ដែលធ្វើការងារសង្គមជាគំរូកន្លងមកផងនោះ លោក សាយ ទទួលបានការផ្ដល់ទំនុកចិត្ត និង ផ្ដល់ឱកាសពី អគ្គនាយកនៃអគ្គនាយកដ្ឋានយុវជន និង រាជរដ្ឋាភិបាលកម្ពុជា តែងតាំងជាប្រធានប្រតិភូ ដឹកនាំប្រតិភូយុវជនកម្ពុជា ចូលរួមកម្មវិធី នាវាយុវជនអាស៊ីអាគ្នេយ៍និងជប៉ុន លើកទី ៤៩ នេះ៕
