ក្រោយពីការប្រកួតជម្រុះជាច្រើនវគ្គហើយនោះ ទីបំផុតកម្មវិធីប្រកួតចម្រៀងរ៉េប Rapper Fighter បានស្វែងរកជើងខ្លាំងចំនួន ៥ នាក់ ដើម្បីទៅប្រកួតក្នុងវគ្គផ្តាច់ព្រ័ត្រ ដែលនឹងរៀបចំឡើងនៅថ្ងៃទី ០២ ខែកុម្ភៈ ឆ្នាំ ២០២៥ ខាងមុខនេះហើយ។
ក្នុងចំណោមបេក្ខជនឆ្នើមទាំង ៥ នាក់ មហាជនក៏បានចាប់ក្រសែភ្នែក និង គាំទ្រដល់បេក្ខជន Rango ដែលជាកូនក្រុមរបស់លោក វុទ្ធា ដូចគ្នាដែរ ដោយបេក្ខជនរូបនេះ មានសមត្ថភាពខ្លាំងមិនធម្មតានោះឡើយពីមួយវគ្គទៅមួយវគ្គ។
ដោយឡែក ការប្រកួតវគ្គផ្តាច់ព្រ័ត្រកាន់តែកៀកមកដល់ ស្រាប់តែលោក Rango បានបង្ហាញអារម្មណ៍បាក់ទឹកចិត្ត បន្ទាប់ពីមានអ្នកចូលទៅខមមិនពីរូបសម្រស់របស់លោកថា៖ «កុំសង្ឃឹមអី Rango មានតែសមត្ថភាពតែអន់សម្រស់ ក៏មិនអាចជាប់លេខ ១ ដែរ។ សុំទោស និយាយត្រង់»។
ក្នុងនោះ លោក Rango បានបង្ហាញអារម្មណ៍ដោយរៀបរាប់តាមរយៈ Status មួយថា៖ «ឃើញ comment នេះហើយ បេះដូងខ្ញុំស្ទើរតែបែកហើយ។ ទឹកចិត្ត និការរំពឹងទុកស្ទើរតែរលាយទៅហើយ! បងប្រុស comment ត្រូវតែគួរតែយល់ពីចិត្តខ្ញុំផង សល់មិនប៉ុន្មានថ្ងៃទៀតទេ ខ្ញុំត្រូវឡើងវគ្គផ្ដាច់ព្រាត់ហើយ តើខ្ញុំមានកម្លាំងចិត្តមកពីណា? គ្មាននរណាម្នាក់កើតមកចង់អាក្រក់ទេបង»។
លើសពីនោះ ក្រោយទទួលបានការលើកទឹកចិត្តពីអ្នកគាំទ្រ លោក Rango ក៏បានបន្ថែមខមមិននៅក្រោម status នោះថា៖ «នៅមុខអ្នករាល់គ្នា តែងតែញញឹមសើចសប្បាយ តែមិនដែលបង្ហាញអារម្មណ៍នៅពីក្រោយយ៉ាងណាទេ ព្រោះមិនចង់ឃើញអ្នកគាំទ្ររបស់ខ្ញុំឃើញខ្ញុំពិបាកចិត្ត។ អរគុណអ្នកទាំងអស់គ្នា»៕
