ដំណឹងមរណភាពដ៏ក្រៀមក្រំ កាលពីថ្ងៃទី ៩ ខែតុលា ឆ្នាំ ២០២៤ កន្លងទៅនេះ ធ្វើឱ្យមហាជនអ្នកគាំទ្រលើបណ្ដាញសង្គម ជាពិសេសអ្នកក្នុងសិល្បៈចម្រៀងមានការសោកស្ដាយជាពន់ពេក ចំពោះការបាត់បង់សិល្បករលោក ថុល លីណា អតីតបេក្ខជន Cambodian Idol រដូវកាលទី ២ និង X Factor Cambodia ដែលបានទទួលមរណភាពដោយសារគ្រោះថ្នាក់ចរាចរណ៍។
ចំពោះការចាកចេញគ្មានថ្ងៃត្រឡប់របស់លោក ថុល លីណា បានបន្សល់ត្រឹមក្តីអាល័យក្នុងចិត្តអ្នកគាំទ្រ និង មិត្តរួមសិល្បៈ ជាពិសេសក្រុមគ្រួសារប្រពន្ធកូនរបស់លោក មានតែក្ដីឈឺចាប់ទុក្ខសោកសង្រេងស្រណោះអាល័យ។
ទាក់ទងនឹងដំណឹងនៃការបាត់ជីវិតដោយសារគ្រោះថ្នាក់មួយប៉ប្រិចភ្នែកនេះ ក៏បានធ្វើឱ្យមហាជនអ្នកគាំទ្រជាច្រើននៅតែនឹកអាល័យដល់សិល្បករមួយរូបទៀត ក៏ជាអតីតបេក្ខជន Cambodian Idol រដូវកាលទី ២ គឺលោក នាង ប្រាក់សុគន្ធ ដែលបានបាត់បង់ជីវិតដោយសារគ្រោះចរាចរណ៍កាលពីថ្ងៃទី ២៥ ខែធ្នូ ឆ្នាំ ២០២១ កន្លងទៅ។
គិតមកដល់ពេលនេះ រយៈពេលជាង ៤ ឆ្នាំមកហើយ ដែលលោក នាង ប្រាក់សុគន្ធ បានលាចាកលោកចោលក្រុមគ្រួសារ ជាពិសេសប្អូនស្រីជាទីស្រឡាញ់ គឺតារាចម្រៀងស្រី នាង គន្ធា ដោយបន្សល់ត្រឹមតែរូបភាព និង ការចង់ចាំពេញដោយក្ដីនឹកអាល័យក្នុងចិត្តក្រុមគ្រួសារ និង អ្នកគាំទ្រផងដែរ៕
