ជាដំណឹងដ៏រន្ធត់ និង តក់ស្លុតបំផុតសម្រាប់អ្នកគាំទ្រវិស័យរ៉េបនៅកម្ពុជា ដោយតារាចម្រៀងរ៉េបវ័យដ៏ល្បីល្បាញ និង ជាគ្រូបង្វឹកមួយរូបក្នុងកម្មវិធី Rapper Fighter លោក RuthKo បានជួបគ្រោះថ្នាក់ចរាចរណ៍បាត់បង់ជីវិតនៅនឹងកន្លែង នៅម៉ោងប្រមាណជា ១ និង ៤០ នាទីទៀបភ្លឺឈានចូលថ្ងៃទី ៦ ខែមករា ឆ្នាំ ២០២៥ នេះ។
តាមព័ត៌មានបឋមបានឱ្យដឹងថា តារាចម្រៀងរ៉េប Ruthko បានជិះម៉ូតូ XR ស្លាកលេខបាត់ដំបង 1AL-9616 បុកជាមួយរថយន្ត LEXUS RX330 ស្លាកលេខខេមរភូមិន្ទ09 2-4771 លើផ្លូវ ៦០ ម៉ែត្រ ដែលបើកបត់ឆ្លងបញ្ច្រាសបំណងចូលបុរីប៉េងហួត បណ្ដាលឱ្យជនរងគ្រោះបាត់បង់ជីវិត ក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ នៅវេលាម៉ោង ១ និង ៣០នាទីយប់រំលងអធ្រាត្រ ឈានចូលថ្ងៃទី៦ ខែមករា ឆ្នាំ ២០២៥ ។
ភ្លាមៗ ភាគីខាងបើកបររថយន្ត ក៏ត្រូវសមត្ថកិច្ចឃាត់ខ្លួនបាន និង បញ្ចូនទៅដោះស្រាយតាមនីតិវិធី។ តែយ៉ាងណា ដំណឹងមរណភាពរបស់តារាចម្រៀងរ៉េបរូបនេះ បានធ្វើឱ្យមិត្តរួមចង្កោមសិល្បៈ ក៏ដូចជាមហាជនទាំងមូលមានក្ដីសោកស្ដាយមិនអស់ចិត្តជាខ្លាំង។
ក្រឡេកមកមើលលោក វុទ្ធា តារាចម្រៀងរួមទ្រនំជាមួយ RuthKo ក្នុងផលិតកម្ម Klapyahandz ព្រមទាំងជាមិត្តសម្លាញ់ រាប់អានគ្នាដូចបងប្អូនល្អរមែងទៅណាមកណាជាមួយគ្នារាប់ឆ្នាំមកហើយនោះ បានបង្ហោះសារយ៉ាងក្តុកក្តួលថា៖ «ថ្ងៃនេះ ខ្ញុំបានបាត់បង់បងប្អូនជាទីស្រឡាញ់ម្នាក់ទៀតហើយ! អរគុណសម្រាប់ពេលវេលា ដែលយើងបានស្គាល់គ្នាប្អូនប្រុស R.I.P RuthKo»៕
