សម្ទុះគាំទ្រខ្លាំង! ស្អែកនេះ ការដើរថ្មើជើង Solidarity March នឹងមានការចូលរួមយ៉ាងច្រើនពីបណ្តាអ្នកផលិតមាតិកាសង្គម សិល្បករ និង សិល្បការិនី

ដូចប្រិយមិត្តបានដឹង នៅព្រឹកស្អែកថ្ងៃទី ១៨ ខែមិថុនា ឆ្នាំ ២០២៥ ​សហភាពសហព័ន្ធយុវជនកម្ពុជា (ស.ស.យ.ក.) នឹងរៀបចំកម្មវិធី ការដើរថ្មើរជើង «Solidarity March»  ដើម្បីបង្ហាញការរួមគ្នាជាធ្លុងមួយ គាំទ្រដល់រាជរដ្ឋាភិបាល និង កងកម្លាំងជួរមុខកម្ពុជា។

កម្មវិធីដែលនឹងរៀបចំការថ្មើរជើងឆ្ពោះពីមហោស្រពកោះពេជ្រ ទៅកាន់វិមានឯករាជ្យនេះ ឃើញថា មានការបង្ហាញឆន្ទៈចូលរួមយ៉ាងច្រើនកុះករពីសាធារណជន ជាពិសេស បុគ្គលមានឥទ្ធិពលនៅលើបណ្តាញសង្គម ដែលដើរតួយ៉ាងសំខាន់នៅក្នុងការផ្សព្វផ្សាយ។ ជាក់ស្តែង តាមការបង្ហោះរបស់ទំព័រហ្វេសប៊ុក សហភាពសហព័ន្ធយុវជនកម្ពុជា ព្រឹកស្អែកនេះ នឹងមានការចូលរួមពីបងប្អូនអ្នកផលិតមាតិកាសង្គម សិល្បករ សិល្បការិនី ជាច្រើន បានត្រៀមខ្លួនរួចជាស្រេច សម្រាប់ការដើរថ្មើជើង Solidarity March។

គួរឱ្យដឹងដែរថា កម្មវិធីនេះធ្វើឡើងក្នុងគោលបំណង បង្ហាញពីស្មារតី សកម្មភាព កាយវិការ និង សំឡេងនៃការគាំទ្ររបស់យើងទាំងអស់គ្នា ដែលកើតចេញពីការជឿជាក់យ៉ាងមុតមាំចំពោះរាជរដ្ឋាភិបាល និង កងកម្លាំងប្រដាប់អាវុធក្នុងបុព្វហេតុការពារជាតិមាតុភូមិ៕