នៅយប់ថ្ងៃទី ១៨ ខែសីហា ឆ្នាំ ២០២៥ សម្ដេចតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា បានបង្ហោះសារឱ្យបានដឹងថា ៖ «តាមកាសែតថៃចុះផ្សាយមុននេះបន្តិចថា លោកនាយករដ្ឋមន្ត្រីស្តីទីថៃបាននិយាយថា លោក ហ៊ុន សែន និង ហ៊ុន ម៉ាណែត នឹងត្រូវចាប់ខ្លួនភ្លាមប្រសិនបើរកឃើញក្នុងប្រទេសថៃ»។
សម្ដេចបានមានប្រសាសន៍ឆ្លើយតបឱ្យដឹងថា ៖ «ប្រសិនបើការចុះផ្សាយរបស់កាសែតជាសម្ដីពិតរបស់នាយករដ្ឋមន្ត្រីស្តីទីជិតផុតអាណត្តិ បង្ហាញឱ្យឃើញថា គាត់គឺជាមនុស្សព្រៃមិនស្គាល់អ្វីទៅជាច្បាប់ទម្លាប់ ហើយមិនទាំងចេះការទូតទៀតផង។ ប្រសិនបើថៃអាចចាប់មេដឹកនាំកម្ពុជាបាន កម្ពុជាក៏អាចចាប់មេដឹកនាំថៃមួយចំនួនដែលបានឈ្លានពាន និង សម្លាប់ប្រជាជនកម្ពុជាបានដូចគ្នាដែរ។ ច្បាប់ទម្លាប់ត្រូវបានបំផ្លាញដោយពួកឈ្លានពាន។ តើនេះជាគោលបំណងដើម្បីបង្កើតជំនឿទុកចិត្ត និង ឈានទៅរកទំនាក់ទំនងល្អ ឬ បំផ្លាញដើម្បីបង្កើតជម្លោះឡើងវិញក្រោយកិច្ចព្រមព្រៀងឈប់បាញ់?»។
គួរឱ្យដឹងដែរថា កាលដែលសម្ដេចតេជោ ហ៊ុន សែន បានបង្ហោះសារលើកឡើងដូច្នេះ គឺបន្ទាប់ពីបានឃើញសារព័ត៌មានថៃមួយបានចុះផ្សាយកាលពីល្ងាចថ្ងៃទី ១៨ ខែសីហា ឆ្នាំ ២០២៥ ដោយបានដកស្រង់សម្តីលោក Phumtham នាយករដ្ឋមន្ត្រីស្តីទីថៃដែលលើកឡើងថា លោកបានជម្រុញឱ្យក្រុមប្រឹក្សាសន្តិសុខជាតិ (NSC) ដាក់ពាក្យបណ្តឹងរដ្ឋប្បវេណី និង ព្រហ្មទណ្ឌប្តឹងចំពោះមេដឹកនាំកម្ពុជា គឺសម្តេច ហ៊ុន សែន និង សម្តេច ហ៊ុន ម៉ាណែត ក្នុងករណីដែលបានប្រើកម្លាំងយោធា និង ប្រដាប់អាវុធបង្កការប៉ះពាល់ដល់អធិបតេយ្យភាព និង អាយុជីវិត ទ្រព្យសម្បត្តិរបស់ប្រជាជនថៃ។ បើសិនជាសម្តេចទាំងពីរចូលមកដល់ក្នុងទឹកដីប្រទេសថៃពេលណា នោះនឹងត្រូវចាប់ខ្លួនយកមកកាត់ទោសទៅតាមផ្លូវច្បាប់៕
