មហាជនសុទ្ធសឹងតែបានស្គាល់ហើយពីតារាសម្ដែងស្រី ស៊ឹម ស្រីនិច ដែលកន្លងមកឆក់បានប្រជាប្រិយភាពខ្លាំងជាមួយស្នាដៃសម្ដែង ព្រមទាំងរូបសម្រស់ដ៏ស្រស់ស្អាតផូរផង់របស់នាង ដោយមានសន្ទុះទីផ្សារខ្ពស់លេចមុខក្នុងភាពយន្តខ្មែរជាច្រើន និង ក្ដាបបានតំណែងតួឯកស្រីជាបន្តបន្ទាប់។
ម្យ៉ាងវិញទៀត ស៊ឹម ស្រីនិច ក៏តែងត្រូវបានអ្នកគាំទ្រចាប់អារម្មណ៍ និង សរសើរពីទេពកោសល្យយ៉ាងប៉ិនប្រសប់របស់នាង ដែលឃើញថានាងអាចសម្ដែងបានគ្រប់ទម្រង់ គ្រប់តួអង្គមានស្លូត កាច ឆ្នាស់ និង ចរិតលក្ខណៈតួអង្គផ្សេងៗទៀតយ៉ាងស័ក្តិសម។
ដោយឡែក មកដល់ថ្មីៗនេះ អ្វីដែលធ្វើឱ្យមហាជនចាប់អារម្មណ៍លើសមត្ថភាព ទេពកោសល្យក្នុងវិស័យសម្ដែងរបស់តារាស្រីរូបនេះទៀត ខណៈបានឃើញនាងបង្ហាញវត្តមានក្នុងការសម្ដែងទម្រង់សិល្បៈបុរាណម្ដង គឺក្ដោបបានតំណែងជាតួឯកស្រីក្នុងទស្សនីយភាពដ៏ធំនៃល្ខោនបាសាក់រឿង «កែវ មុន្នីរតនា ធីតាមុខសេះ» រួមជាមួយសិល្បករល្បីៗជាច្រើនទៀត។
ចំពោះទស្សនីយភាពល្ខោនបាសាក់នេះដែរ បានបើកដំណើរការសម្ដែងជាផ្លូវការកាលពីថ្ងៃទី ១២ ខែតុលា ឆ្នាំ ២០២៥ កន្លងទៅ នៅឯរោងមហោស្រពពិមានអាកាស ក្រោមអធិបតីភាពដ៏ខ្ពង់ខ្ពស់បំផុតរបស់លោកជំទាវបណ្ឌិត ពេជ ចន្ទមុន្នី ដែលជាការចូលរួមលើកទឹកចិត្តដល់សិល្បករ-រិនី លោកគ្រូ អ្នកគ្រូចំពោះការជួយលើកកម្ពស់នូវទម្រង់សិល្បៈខ្មែរដែលកំពុងប្រឈមនឹងការបាត់បង់។
គួរឱ្យដឹងដែរថា ទស្សនីយភាពល្ខោនបាសាក់ រឿង «កែវ មុន្នីរតនា ធីតាមុខសេះ» ជាការសហការរៀបចំដោយក្រសួងវប្បធម៌ និង វិចិត្រសិល្បៈ, នាយកដ្ឋានជំរុញចលនាវប្បធម៌ សាសនា និង ប្រវត្តិសាស្ត្រ នៃសហភាពសហពន្ធ័យុវជនកម្ពុជា គាំទ្រដោយសមាគមសិល្បករខ្មែរ និង សហភាពសហពន្ធ័យុវជនវិស័យវប្បធម៌ និង វិចិត្រសិល្បៈ ដែលមានការចូលរួមសម្តែងដោយសិល្បករ-ការិនី នៃសាលាមធ្យមវិចិត្រសិល្បៈ និង សិល្បករ-ការិនីឯករាជ្យមួយចំនួនផងដែរ៕
