តាមការបង្ហាញនៅលើបណ្តាញសង្គម លោក អ៊ឹង ស៊ីវឈន់ និង នារីគូដណ្តឹង ជាបុត្រីក្នុងសែរាជវង្ស គឺ ព្រះអង្គម្ចាស់ក្សត្រិយ៍ នរោត្តម ពង្សសូរិយា នឹងឈានដល់ថ្ងៃចូលរោងជ័យនាពេលពីរខែខាងមុខ។ បច្ចុប្បន្ន គូស្នេហ៍ដ៏ស័ក្តិសមមួយគូនេះ បានកំពុងបង្ហាញភាពផ្អែមល្ហែមតាមរយៈការបង្ហោះរូបភាព ជាពិសេស រូបភាព Pre-wedding ថតសម្រាប់ថ្ងៃមង្គលតែម្តង។
ជាមួយរូបភាព Pre-wedding ឃើញថា លោក អ៊ឹង ស៊ីវឈន់ និង នារីគូដណ្តឹង ភាគច្រើនស្លៀកពាក់ជាឈុតបែបប្រពៃណីខ្មែរ និង ជ្រើសរើសទីតាំងថតនៅខេត្តសៀមរាប។ ចំណោមឈុតប្រពៃណី ឬ ឈុតបុរាណ ថ្មីៗនេះ ឃើញមានឈុតមួយ ដែលបង្ហាញពីការដកស្រង់សម្លៀកបំពាក់ខ្មែរកាលពីសម័យកាលមុន មករៀបចំថតបែបថ្មីផងដែរ។
បើតាមការបង្ហោះរូបភាពនៅលើគណនី ព្រះអង្គម្ចាស់ក្សត្រិយ៍ នរោត្តម ពង្សសូរិយា ទ្រង់បានភ្ជាប់មកជាមួយរូបភាពពីសម័យកាលមុនមួយសន្លឹក និង រូបភាពទ្រង់ថតបែបថ្មី ដែលបង្ហាញពីការគ្រងសម្លៀកបំពាក់ ដែលដកស្រង់ពីសម័យកាលនោះ។
ភ្ជាប់នឹងរូបភាព ទ្រង់បានសរសេរយ៉ាងដូច្នេះថា៖ «ខ្ញុំតែងតែស្រមៃថា បានបំផុសគំនិតសម្លៀកបំពាក់ តាមបែបសម័យបុរាណខ្មែរយើង និង យកមកថតជាថ្មីឱ្យបានស្រស់ស្អាត។ ខ្ញុំសង្ឃឹមថា អ្នកទាំងអស់គ្នានឹងចូលចិត្ត ដោយសារក្រុមការងារយើងបានខិតខំប្រឹងប្រែងសម្រិតសម្រាំងណាស់ ដើម្បីសម្រេចសមិទ្ធផលដ៏ល្អនេះ។ អរគុណក្រុមការងារគ្រប់គ្នា ដែលបានផ្ដិតយករូបភាពដ៏ស្រស់ស្អាតទាំងនេះ»៕
