ជាការពិតណាស់ មហាជននិយមតាមដានជីវិតសិល្បៈ និង ឯកជនរបស់អ្នកនាង ឱក សុគន្ធកញ្ញា ច្បាស់ជាបានជ្រាបហើយថា កន្លងមក ឱ្យតែមានពិធីបុណ្យទានមិនថាតូចធំ នៅក្នុងប្រទេសកម្ពុជានោះទេ គេតែងតែឃើញវត្តមានរបស់អ្នកនាង និង ស្វាមីបានបង្ហាញរូបភាពជួបជុំក្រុមគ្រួសារពោរពេញដោយសុភមង្គល។
ជាក់ស្តែង ពេលានៃការរង់ចាំអស់រយៈពេលជាច្រើនខែ សម្រាប់ប្រជាជនកម្ពុជាក្នុងឱកាសពិធីបុណ្យភ្ជុំបិណ្ឌបានមកដល់ហើយ ដោយនៅថ្ងៃទី ០៨ ខែកញ្ញា ឆ្នាំ ២០២៥ នេះ ពិធីកាន់បិណ្ឌ ១ ក៏បាន និង កំពុងរៀបចំគ្រប់ទីវត្តអារាមទាំងក្នុង និង ក្រៅប្រទេស ដោយក្នុងនោះអ្នកគាំទ្រក៏បានឃើញក្រុមគ្រួសាររបស់កំពូលតារាចម្រៀង ឱក សុគន្ធកញ្ញា ក៏មិនខុសប្លែកពីប្រជាជនខ្មែរដទៃនោះដែរ ដោយអ្នកនាង បានបង្ហាញរូបភាពថតជុំគ្រួសារពោរពេញដោយស្នាមញញឹមដើម្បីអបអរពិធីបុណ្យប្រពៃណីជាតិដ៏ធំនេះ។
លើសពីនោះ ក្នុងឈុតប្រពៃណីយ៉ាងប្រណីតសមសួនលក្ខណៈគ្រួសារនោះដែរ អ្នកនាង ឱក សុគន្ធកញ្ញា ក៏បានភ្ជាប់នូវសំណេរយ៉ាងមានអត្ថន័យថា៖ «រីករាយពិធីកាន់បិណ្ឌ និងភ្ជុំបិណ្ឌប្រពៃណីជាតិខ្មែរ។ ចាប់ពីថ្ងៃទី ៨ កញ្ញា តទៅនេះ បិណ្ឌ ១ ដល់ បិណ្ឌ ១៥ ជាថ្ងៃបងប្អូនប្រជាជនខ្មែរប្រកាន់ខ្ជាប់នូវប្រពៃណី ធ្វើបុណ្យដាក់ទាន ឧទ្ទិសកុសលផលបុណ្យជូនដល់បុព្វការីជន សាច់ញាតិទាំងប្រាំពីរសណ្តាន។ សូមឱ្យគ្រប់ការធ្វើដំណើរទាំងអស់ប្រកបដោយសុខសុវត្ថិភាព និង ចូលរួមគោរពច្បាប់ចរាចរណ៍ឱ្យបានខ្ជាប់ខ្ជួន។»៕
