សមជាគំរូ! អ្នកឧកញ៉ា តុល លន ធុរជនខ្លាំងក្នុងវិស័យអចលនទ្រព្យ តែងចូលរួមសន្ធឹកសន្ធាប់ក្នុង​ការងារសង្គម និង សប្បុរសធម៌នានា

នៅក្នុងវិស័យអចលនទ្រព្យ អ្នកឧកញ៉ា តុល លន ត្រូវបានគេស្គាល់ថាជា ពាណិជ្ជករមួយរូប ដែលមានបទពិសោធជាច្រើនឆ្នាំជាមួយនឹងគម្រោងបុរី ខុនដូ អគារពាណិជ្ជកម្ម ផ្សារទំនើប និង គម្រោងជាច្រើនផ្សេងទៀតដែលមានទីតាំងនៅក្នុងរាជធានីភ្នំពេញ និង នៅខេត្តព្រះសីហនុ។

ជាក់ស្តែង ក្រៅពីជាសមាជិកក្រុមប្រឹក្សាភិបាលនៃសមាគមឧកញ៉ាកម្ពុជា អ្នកឧកញ៉ា គឺជាស្ថាបនិក និង ជាប្រធានក្រុមប្រឹក្សាភិបាលនៃក្រុមហ៊ុន 5 អិលអេច លន ស៊ីធី ឌីវេឡុបម៉ិន ឯ.ក. (5LH Lorn City Development Co., Ltd.) ដែលជាក្រុមហ៊ុនវិនិយោគលើវិស័យអចលនទ្រព្យ (អភិវឌ្ឍន៍លំនៅឋាន)។

បច្ចុប្បន្ន ក្រុមហ៊ុនរបស់អ្នកឧកញ៉ាបានរួមចំណែកបង្កើតការងារជាច្រើនជូនប្រជាពលរដ្ឋក្នុងសង្គម។ អ្នកឧកញ៉ា ក៏ជាធុរជនពោរពេញដោយបទពិសោធ និង វិជ្ជាជីវៈខ្ពស់ ដែលអាចប្រើប្រាស់ភាសាខ្មែរ និង អង់គ្លេស។

ក្រៅពីការងារធុរកិច្ច នាពេលកន្លងមក អ្នកឧកញ៉ាបានចូលរួមចំណែកយ៉ាងសកម្ម និង សន្ធឹកសន្ធាប់ក្នុងការងារសង្គម និង សប្បុរសធម៌នានារួមមាន៖ ចូលរួមកសាងវត្តអារាមព្រះពុទ្ធសាសនាដូចជា ព្រះវិហារ សាលាឆាន់ កុដិ និងព្រះពុទ្ធរូប នៅតាមបណ្ដាខេត្ដមួយចំនួន បរិច្ចាគថវិកាដល់មណ្ឌលកុមារកំព្រា មន្ទីរពេទ្យគន្ធបុប្ផា និង ឧបត្ថម្ភដល់កងទ័ពការពារព្រំដែនផងដែរ។

តាមរយៈការចូលរួមទាំងនេះ អ្នកឧកញ៉ាត្រូវបានរាជរដ្ឋាភិបាលកម្ពុជាទទួលស្គាល់ និង ផ្តល់កិត្តិយសតាមរយៈគ្រឿងឥស្សរិយយសជាច្រើន ជាពិសេសគ្រឿងឥស្សរិយយសថ្នាក់កំពូល «ជាតូបការ» ដែលប្រោសព្រះរាជទានដោយព្រះមហាក្សត្រ នៃព្រះរាជាណាចក្រកម្ពុជាផងដែរ៕

ប្រភព៖ Cambodian Oknha Association