នៅថ្ងៃទី ១៩ ខែឧសភា ឆ្នាំ ២០២៥ កន្លងទៅនេះ មហាជនអ្នកលេងបណ្ដាញសង្គម ជាពិសេសអ្នកគាំទ្ររបស់កំពូលតារាចម្រៀងស្រី ឱក សុគន្ធកញ្ញា បានចាប់អារម្មណ៍ចែករំលែកបង្ហាញការអបអរ និង រំភើបចិត្ត ក្រោយពីទទួលបានព័ត៌មានថាកំពូលតារាស្រីរូបនេះ ត្រូវបានក្រសួងអប់រំ យុវជន និង កីឡា ប្រកាសក្លាយជាទូតសុច្ឆន្ទៈនៃកាយរឹទ្ធិជាតិកម្ពុជា។
នេះបើតាមរយៈហ្វេសប៊ុកផេកផ្លូវការរបស់ ក្រសួងអប់រំ យុវជន និង កីឡា បានបង្ហោះអបអរស្វាគមន៍ ក្រោយរៀបចំពិធីបំពាក់កន្សែង និង សំណេះសំណាលផ្ទាល់ជាមួយអ្នកនាង ឱក សុគន្ធកញ្ញា ដោយក្រសួងបានរៀបរាប់ថា ៖ «អបអរសាទរ លោកស្រី ឱក សុគន្ធកញ្ញា ទូតសុច្ឆន្ទៈ នៃកាយរឹទិ្ធជាតិកម្ពុជា សមាជិកកាយរឹទិ្ធជាតិកម្ពុជាទាំងអស់ សូមស្វាគមន៍យ៉ាងកក់ក្តៅ និងថ្លែងអំណរគុណយ៉ាងជ្រាលជ្រៅ ដល់ទឹកចិត្តសប្បុរស និងការលះបង់ពេលវេលាដ៏មានតម្លៃរបស់លោកស្រី ដែលស្ម័គ្រចិត្តក្នុងការផ្សព្វផ្សាយ ចលនាកាយរឹទិ្ធជាតិកម្ពុជា និងការអប់រំនៅព្រះរាជាណាចក្រកម្ពុជា»។
ជាមួយគ្នានេះដែរ មហាជនលើបណ្ដាញសង្គម ក៏ដូចមិត្តអ្នកសិល្បៈជាច្រើន បានបង្ហាញការអបអរ និង គាំទ្រពេញចិត្តចំពោះការប្រកាសរបស់ក្រសួងអប់រំ ដែលបានជ្រើសរើសកំពូលតារាចម្រៀងស្រីរូបនេះ ដើម្បីជួយផ្សព្វផ្សាយពីកាយរឹទ្ធិជាតិ និង វិស័យអប់រំកម្ពុជានេះ៕
ប្រភព៖ ក្រសួងអប់រំ យុវជន និង កីឡា
