រឿងរ៉ាវមួយកំពុងតែបង្កឱ្យមានការចាប់អារម្មណ៍យ៉ាងខ្លាំងនៅតាមបណ្តាញសង្គមវៀតណាម ដោយមាននារីម្នាក់កាន់ប៉េងប៉ោងអបអរថ្ងៃខួបកំណើតខ្លួនឯង ស្រាប់តែឆេះជាមួយទៀននំខេក បណ្តាលឱ្យផ្ទុះឆាបមុខអស់សម្រស់រលីង។
តាមរយៈវីដេអូបានបង្ហាញឱ្យឃើញពីនារីរងគ្រោះ ដែលដៃម្ខាងកំពុងកាន់គ្រវីប៉េងប៉ោង និងដៃម្ខាងទៀតកាន់នំខេកអបអរថ្ងៃខួបកំណើតរបស់ខ្លួនយ៉ាងសប្បាយរីករាយ ស្រាប់តែប៉េងប៉ោងធំបានឆេះជាមួយនឹងភ្លើងទៀននំខេក ហើយឆាបឆេះមុខនាងមួយវ៉ឹបយ៉ាងសន្ធោសន្ធៅ ដែលបណ្តាលឱ្យនាងត្រូវរត់ខ្ទប់មុខចេញភ្លាមៗ។
យ៉ាងណាមិញ នារីរូបនេះបង្ហាញពីអាការរបស់នាងនៅតាមបណ្តាញសង្គម ដោយឃើញមុខមាត់របស់នាងត្រូវឆេះរោលធ្ងន់ធ្ងរ ហើយក៏របួសដល់ដៃទៀត។ ដោយឡែក នាងបានឱ្យដឹងថា នាងបានបង្ហោះវីដេអូនេះដើម្បីឱ្យមហាជនបានមើល ដើម្បីទុកជាការប្រុងប្រយ័ត្នទាំងអស់គ្នា កុំឱ្យប្រទះហេតុការណ៍ដូចជានាង៕
ប្រភព៖ Khaosod
