ថ្មីៗនេះ មានករណីមួយនៅប្រទេសជប៉ុន ដែលមានបុរសម្នាក់ខំសន្សំលុយជាង ១០ ឆ្នាំ ដើម្បីទិញឡានទំនើប Ferrari ក្នុងក្តីស្រម៉ៃ តែមានអីជិះទើបតែបាន ១ ម៉ោង ស្រាប់តែឡានផ្ទុះឆេះខ្ទេច។
តាមព័ត៌មានបានឱ្យដឹងថា ហេតុការណ៍បានកើតឡើងតាំងពីថ្ងៃទី ១៦ ខែមេសា ឆ្នាំ ២០២៥ កន្លងទៅម្ល៉េះ ដោយបុរសនេះបានសន្សំលុយជាង ១០ ឆ្នាំ ដើម្បីទិញឡាន Ferrari ខាងលើ ដែលខ្លួនបានស្រឡាញ់ជាយូរ ក្នុងតម្លៃចំនួន ៤៣ លានយ៉េន ស្មើប្រមាណជាង ២៧៩ ៥០០ ដុល្លារ។ យ៉ាងណាមិញ ស្រាប់តែបើកចេញពីកន្លែងលក់បានជាង ១ ម៉ោង ក៏ស្រាប់តែឃើញឡានមានហ៊ុយផ្សែង ទើបចុះពីឡានហើយហៅខាងអ្នកពន្លត់អគ្គិភ័យមក តែសំណាងមិនល្អ ឡានក៏ឆេះសឹងតែទាំងអស់ទៅហើយ។
ដោយឡែក ករណីមួយនេះកំពុងតែស្ថិតក្នុងការស៊ើបពិនិត្យនៅឡើយ តែគេបានសន្និដ្ឋានបឋមថា ឡាននេះអាចចាប់ផ្តើមឆេះពីក្នុងម៉ាស៊ីនមក។ ចំណែកបុរសជាម្ចាស់ឡានវិញ ពិតជាមានការសោកស្តាយខ្លាំងណាស់ ព្រោះខំសន្សំលុយជាង ១០ ឆ្នាំមកទិញឡានដែលខ្លួនស្រឡាញ់ គិតថាបានជិះសប្បាយហើយ តែចុងក្រោយបានត្រឹមតែមើលរូបថត៕
ប្រភព៖ Sanook
