ថ្មីៗនេះ តាមរយៈកម្មវិធី 40 under 40 របស់ទស្សនាវដ្តីអន្តរជាតិ Prestige បានបង្ហាញពីបុគ្គល ៤០ រូប អាយុក្រោម ៤០ ឆ្នាំ ដែលមានសមត្ថភាពខ្ពស់ ស្នាដៃល្អនៅក្នុងអាជីព និង មានឥទ្ធិពលទាំងក្នុងប្រទេស និង បណ្តាប្រទេសមួយចំនួននៅក្នុងតំបន់អាស៊ី។ ចំណោមបុគ្គលខ្លាំងវ័យក្មេង ក្នុងនោះក៏មាន លោក លី ហ្សេឌីន (ZEDINE LY) ដែលគេស្គាល់ថា ជាអ្នកដឹកនាំដ៏លេចធ្លោ នៅក្នុងក្រុមហ៊ុនអភិវឌ្ឍន៍អចលនទ្រព្យលំដាប់ខ្ពស់មួយនៅកម្ពុជាផងដែរ។
ជាក់ស្តែង បើតាមការលម្អិតនៅលើមាតិកា 40 under 40 ឆ្នាំ ២០២៥ លោក លី ហ្សេឌីន មានវ័យទើបតែ ២៥ ឆ្នាំ កំពុងកាន់តំណែងជាជំនួយការនាយកប្រតិបត្តិ (Executive Assistant Manager) នៅក្រុមហ៊ុន Angkor Palace Development Co., Ltd. ដែលជាក្រុមហ៊ុនអភិវឌ្ឍន៍អចលនទ្រព្យលំដាប់ខ្ពស់មួយនៅកម្ពុជា។ នៅក្នុងតួនាទី លោកមើលការខុសត្រូវទៅលើគម្រោងសាងសង់ និង រៀបចំអនាគតនៃអាជីវកម្មគ្រួសារ។
ជាមួយជំនាញផ្នែកស្ថាបត្យកម្ម ដែលបញ្ចប់ការសិក្សាពីសាកលវិទ្យាល័យ Monash នៅទីក្រុង Melbourne ប្រទេសអូស្រ្តាលី លោក លី ហ្សេឌីន បានចូលរួមយ៉ាងសកម្មគ្រប់ដំណាក់កាលនៃការអភិវឌ្ឍន៍ រាប់តាំងពីការបង្កើតគំនិត រហូតដល់ការប្រតិបត្តិ។
ក្រៅពីការងារខាងលើ លោកក៏បានប្រើជំនាញថត ដើម្បីបង្ហាញពីសម្រស់ប្រទេសកម្ពុជា និង ជួយដល់បុព្វហេតុសប្បុរសធម៌ផងដែរ។
បើតាមទស្សនាវដ្តីហ្វេហ្សិនក្នុងស្រុកចុះផ្សាយកន្លងមក លោក លី ហ្សេឌីន ក៏ជាស្ថាបនិក Acthive ដែលជាម៉ាកយីហោសម្លៀកបំពាក់កីឡា បង្កើតឡើងជាមួយគោលបំណង ឈានឆ្ពោះទៅជួយប្រជាជនកម្ពុជាឱ្យបានសម្រេចនូវគោលបំណងផ្នែកកីឡា និង សុខភាពរបស់ខ្លួនជាមួយនឹងឈុតសម្លៀកបំពាក់ ដែលផ្តល់ប្រសិទ្ធភាព និង ផាសុកភាពល្អបំផុត៕
