បន្ទាប់ពីមានការជូនដំណឹងស្ដីពីការរៀបចំយុទ្ធនាការ «១ ម៉ឺនរៀល ១ ម៉ឺននាក់» ឆ្នាំ ២០២៥ របស់មូលនិធិគន្ធបុប្ផាកម្ពុជា ដែលផ្ដួចផ្ដើម និង ដឹកនាំដោយលោកជំទាវបណ្ឌិត ពេជ ចន្ទមុន្នី ប្រធានកិត្តិយសនៃមូលនិធិគន្ធបុប្ផាកម្ពុជា គេបានឃើញមហាជនជាច្រើនបានចូលរួមបរិច្ចាគ ដោយក្នុងនោះមានអ្នកបរិច្ចាគលើសពី ១ ម៉ឺនរៀល ទៀតផង។
ដោយឡែក ក្រឡេកទៅមើលកំពូលតារាចម្រៀងរ៉េប វណ្ណដា ឯណោះវិញ ក៏បានចូលរួមបរិច្ចាគថវិកា ក្នុងយុទ្ធនាការ «១ ម៉ឺនរៀល ១ ម៉ឺននាក់» ឆ្នាំ ២០២៥ របស់មូលនិធិគន្ធបុប្ផាកម្ពុជា ដូចគ្នាដែរ ដោលលោកបានបរិច្ចាគដល់ទៅ ១០ លានរៀល។
លើសពីនោះ មិនត្រឹមតែបានបរិច្ចាគថវិកាផ្ទាល់ខ្លួនចូលរួមដល់យុទ្ធនាការខាងលើនោះទេ លោក វណ្ណដា ក៏បានបំផុសដល់អ្នកគាំទ្ររបស់លោក ឱ្យចូលរួមចំណែក ដើម្បីជួយដល់មន្ទីរពេទ្យគន្ធបុប្ឋាផងដែរ។
គួរជម្រាបថា យុទ្ធនាការ «១ ម៉ឺនរៀល ១ ម៉ឺននាក់» គឺមានគោលបំណងជំរុញចលនាកៀរគរថវិកាសប្បុរសធម៌ឱ្យកាន់តែផុសផុល និង សកម្មបន្ថែមទៀត ក្នុងចំណោមសិស្ស, និស្សិត, យុវជន, មន្រ្តីរាជការ, ថ្នាក់ដឹកនាំ, ពាណិជ្ជករ, សាធារណជន, ភរិយាថ្នាក់ដឹកនាំ, ម្ចាស់ក្រុមហ៊ុន-សហគ្រាស, គណៈកម្មការទ្រទ្រង់មូលនិធិគន្ធបុប្ផាកម្ពុជាប្រចាំក្រសួង-ស្ថាប័ន, រដ្ឋបាលរាជធានី-ខេត្ត និងសមាជិកសមាគមឧកញ៉ាកម្ពុជា ក្នុងមហាចលនាមនុស្សធម៌របស់ជាតិ និង ក្នុងស្មារតី «ខែ្មរជួយខ្មែរ»។ ការរៀបចំយុទ្ធនាការ «១ ម៉ឺនរៀល ១ ម៉ឺននាក់» នេះក៏ជាការចូលរួមអបអរសាទរ «ទិវាកុមារអន្តរជាតិ ១ មិថុនា» និង ដើម្បីជាការរំឭកឱ្យមានការបន្តបរិច្ចាគជូនមូលនិធិគន្ធបុប្ផាកម្ពុជា ក្នុងគោលបំណងរួមមួយគឺនាំក្តីសង្ឃឹម និងភាពញញឹមដល់ទារក និងកុមារ នៅកម្ពុជា៕
