ថ្មីៗនេះ នៅខេត្តភូកេត ដែលជាខេត្តជាប់សមុទ្រដ៏ល្បីរបស់ប្រទេសថៃ ហាក់ដូចជាមានករណីការស្លាប់របស់អ្នកទេសចរបរទេសជាប់ៗគ្នាមិនដាច់សោះ ដែលបង្កឱ្យមានការព្រួយបារម្ភពីសំណាក់មហាជនមិនតិចឡើយ។
ក្នុងនោះដែរ គឺមានករណីការស្លាប់របស់ជនបរទេសរហូតដល់ទៅ ៤ ករណីផ្ទួនៗគ្នាយ៉ាងចម្លែក។ ករណីទីមួយ គឺនៅលើឆ្នេរ Kata ដែលមានបុរសជនជាតិស៊ុយអែតវ័យ ៦៨ ឆ្នាំម្នាក់បានដួលស្លាប់នៅក្នុងទឹកសមុទ្រ ហើយក្រោយមកនៅឆ្នេរដដែលនេះ ក៏មានបុរសម្នាក់បានលង់ទឹកស្លាប់ទៀត។ ករណីទី ៣ គឺគេប្រទះឃើញសាកសពបុរសជនជាតិអាមេរិកវ័យ ២៨ ឆ្នាំម្នាក់ បានមកទើលើឆ្នេរ Patong និង ករណីចុងក្រោយ គឺនៅចន្លោះឆ្នេរចេក និង ឆ្នេរ Nai Thon មានបុរសជនជាតិរុស្ស៊ីវ័យ ៣៥ ឆ្នាំម្នាក់បានលង់ទឹកស្លាប់ទាំងយប់។
យ៉ាងណាមិញ ការស្លាប់របស់អ្នកទេសចរទាំងនេះ គឺគេជឿថាបង្កឡើងដោយសារតែចរន្តទឹកខ្លាំងនារដូវវស្សា ម្យ៉ាងទៀតនៅតាមឆ្នេរទាំងនោះក៏ខ្វះការថែរក្សាសុវត្ថិភាពពីអាជ្ញាធរ ពោលគឺគ្មានការណែនាំ និងដាស់តឿនពីគ្រោះថ្នាក់ដែលអាចកើតឡើងឡើយ៕
ប្រភព៖ SCMP
