ជាការពិតណាស់ មហាជនអ្នកគាំទ្រតារាចម្រៀងស្រីតូចច្រឡឹង អ្នកនាង សុវត្ថិឌី ធារីកា ច្បាស់ជាបានជ្រាបមកហើយ ពីការប្រឹងប្រែងនៃដំណើរឈានជើងចូលប្រឡូកក្នុងវិស័យសិល្បៈ ទម្រាំតែមានភាពជោគជ័យដូចសព្វថ្ងៃនេះ។
ក្នុងនោះ គេចាំបានថា អ្នកនាង សុវត្ថិឌី ធារីកា ចាប់ផ្តើមមានឈ្មោះបោះសំឡេង និង ទទួលបានប្រជាប្រិយភាពខ្លាំងក្រោយពីក្លាយទៅជា Top 4 នៃការប្រកួតចម្រៀងលំដាប់ពិភពលោក Cambodia Idol រដូវកាលទី ១ ប៉ុន្តែ មុននឹងឈានដល់ការប្រកួតមួយនេះ អ្នកនាង សុវត្ថិឌី ធារីកា បានឆ្លងកាត់ការប្រកួតចម្រៀងជាច្រើន ដោយទទួលបានចំណាត់ថ្នាក់លេខ ១ ជាច្រើនកម្មវិធីថែមទៀតផង។
យ៉ាងណាមិញ ក្រោយពីក្លាយទៅជា Top 4 កម្មវិធី Cambodia Idol រដូវកាលទី ១ នឹងក្លាយជាតារាចម្រៀងប្រចាំផលិតកម្មរស្មីហង្សមាសបានប្រមាណ ៤ ឆ្នាំ នោះ នៅពាក់កណ្តាលឆ្នាំ ២០១៩ អ្នកនាង សុវត្ថិឌី ធារីកា ក៏បានចាកចេញពីទ្រនំចាស់ ចូលទៅកាន់ផលិតកម្មថោន។ កាលនោះ អ្នកនាង បានផលិតបទចម្រៀងគ្រប់ចង្វាក់ ដោយទទួលបានប្រជាប្រិយភាពយ៉ាងខ្លាំងផងដែរ។
ដោយឡែក ថ្មីៗនេះ អ្នកគាំទ្របានចាប់អារម្មណ៍ និង សង្ស័យថាតារាស្រីរូបនេះ អាចនឹងចាកចេញពីទ្រនំថោនហើយ ខណៈបទចម្រៀងថ្មី ដែលអ្នកនាងបានចេញសម្រាប់អបអរឱកាសចូលឆ្នាំខ្មែរខាងមុខនេះ មិនស្ថិតក្រោមការផលិតរបស់ផលិតកម្មថោនឡើយ។ យ៉ាងណាក៏ដោយ អ្នកគាំទ្រក៏មិនទាន់ច្បាស់នៅឡើយនោះទេ រង់ចាំការបញ្ជាក់ពីម្ចាស់សាមីខ្លួនសិន៕
