សង្សារចាស់បែកគ្នារាប់ឆ្នាំហើយ សុខៗខាងស្រីលេងល្បិចផ្ញើអេតាស៊ីវិលក្លែងក្លាយមកឱ្យ ខាងប្រុសភ្ញាក់ក្រញាងប៊ិះជាប់អន្ទាក់គេ

សារព័ត៌មានបរទេសមួយ បានទម្លាយពីរឿងរ៉ាវរបស់បុរសម្នាក់ ដែលសុខៗត្រូវសង្សារចាស់ផ្ញើសំបុត្រអេតាស៊ីវិលមកឱ្យមានឈ្មោះជាប្តីប្រពន្ធនឹងគ្នា ទាំងដែលមិនដឹងខ្លួនសោះថាបានទៅចុះជាមួយនាងតាំងពីពេលណា។

តាមព័ត៌មានបានឱ្យដឹងថា បុរសខាងលើនេះ មានវ័យ ៤២ ឆ្នាំ ជាអ្នករស់នៅរដ្ឋតិចសាស សហរដ្ឋអាមេរិក ហើយធ្លាប់មានទំនាក់ទំនងស្នេហាជាមួយនឹងស្រ្តីម្នាក់ឈ្មោះ Kristin Marie Spearman វ័យ ៣៦ ឆ្នាំ តែក៏បានចែកផ្លូវគ្នារួចទៅហើយ ដោយមិនបានឈានដល់ការរៀបការនោះទេ។ នៅថ្ងៃមួយ សុខៗស្រាប់តែនាងបានផ្ញើសំបុត្រអេតាស៊ីវិលឱ្យទៅបុរសរូបនេះ ដោយបញ្ជាក់ថាគេបានរៀបការជាមួយនាងរួចទៅហើយ ដែលធ្វើឱ្យខាងប្រុសភ្ញាក់ផ្អើលជាខ្លាំង ព្រោះខ្លួនមិនធ្លាប់បានចុះអេតាស៊ីវិលជាមួយនាងនោះទេ។

យ៉ាងណាមិញ ខាងអាជ្ញាធរបានស៊ើបដឹងថា ស្រ្តីខាងលើនេះបានបោកប្រាស់លោកឪក្នុងវិហារឱ្យជួយទទួលពិធីរៀបការដោយគ្មានវត្តមានខាងប្រុស រួចហើយនាងក៏បានផ្ញើឯកសារទៅការិយាល័យស្មៀនប្រចាំតំបន់ ឱ្យគេចុះអេតាស៊ីវិលជាផ្លូវការឱ្យ។ ករណីនេះបានចាត់ទុកជាការខុសច្បាប់ ហើយស្រ្តីខាងលើត្រូវបានប៉ូលិសចាប់ខ្លួននៅក្នុងផ្ទះរបស់នាង ក្រោយមកនាងក៏ត្រូវបានដោះលែងឱ្យនៅក្រៅឃុំ ប៉ុន្តែប៉ូលិសនៅតែបន្តធ្វើការដំណើរក្តីនៅក្នុងរឿងនេះជាបន្តបន្ទាប់៕

ប្រភព៖ Khaosod