សង្ឃឹមជាលទ្ធផលល្អ! ឯកឧត្តម ទៀ ស្យាម ដែលទិញសិទ្ធិប្រេន ភីធីធី ត្រៀមដឹកនាំម្ចាស់សិទ្ធិផ្សេងទៀត សម្រេចធ្វើរឿងធំមួយនៅខាងស្អែក

កាលពីថ្ងៃទី ៣១ ខែកក្កដា ឆ្នាំ ២០២៥ កន្លងទៅនេះ ឯកឧត្តម ទា ស្យាម អនុប្រធានសហព័ន្ធកីឡាយានយន្តកម្ពុជា និង ជាអ្នកទិញសិទ្ធិប្រេន ភីធីធី បានបង្ហោះសារនូវការបង្ហាញអារម្មណ៍នូវការប្រមាថមើលងាយមិនបាន ក្រោយប្រទេសសៀមបានឈ្លានពានមកកាន់ទឹកដីកម្ពុជា។

ក្នុងនោះ ឯកឧត្តម ទា ស្យាម បានសរសេរសំណេរតាម Poster មួយថា៖ «យើងខ្ញុំជាម្ចាស់អាជីវកម្មទាំងអស់គ្នា ដែលទិញសិទ្ធិប្រេន PTT Cambodia ទូទាំងប្រទេសកម្ពុជា កំពុងតែប្រមូលផ្តុំកម្លាំង ដើម្បីបញ្ចេញសកម្មភាពឆាប់ៗនេះ។ មនុស្សអាចទ្រាំនឹងការលំបាកបាន តែមិនអាចទ្រាំនឹងការប្រមាថមើលងាយបានឡើយ»។

យ៉ាងណាមិញ នៅថ្ងៃទី ០១ ខែសីហា នេះ ឯកឧត្តម ទា ស្យាម ក៏បានបង្ហោះសារមួយទៀត ដោយបញ្ជាក់ថា នៅថ្ងៃទី ០៣ ខែសីហា ខាងមុខនេះ ក្រុមហ៊ុននៅកម្ពុជាសម្រេចធ្វើរឿងធំមួយ ប៉ុន្តែរង់ចាំការឯកភាពបន្ថែមជាមុនសិន។

សំណេរនោះ បានរៀបរាប់ថា៖ «ពីណាទ្រាំបានក៏ទ្រាំទៅ សម្រាប់ខ្ញុំមិនទ្រាំទៀត ឱ្យគេមើលងាយជាតិសាសន៍តទៀតទេ ខ្ញុំបានសម្រេចចិត្តធ្វើរឿងធំមួយ រង់ចាំការឯកភាពបន្ថែមពីបងប្អូនដទៃទៀត នៅថ្ងៃទី ០៣ ខាងមុខនេះ»៕