ថ្មីៗនេះ សារព័ត៌មាន Xinhua បានរាយការណ៍ឱ្យដឹងថា ប្រទេសវៀតណាមបានរៀបចំរចនាសម្ព័ន្ធប្រទេសជាថ្មី ដោយបានរួមបញ្ជូលខេត្តចំនួន ៦៣ ខេត្ត ឱ្យនៅសល់តែ ៣៤ ខេត្ត ដើម្បីអភិវឌ្ឍយន្តការរដ្ឋឱ្យកាន់តែមានភាពបត់បែន និង មានប្រសិទ្ធភាពជាងមុន។
តាមព័ត៌មានបានឱ្យដឹងថា ខេត្តទាំង ៦៣ នៅក្នុងប្រទេសវៀតណាម ដែលពីមុនបែងចែកជា ៥៧ ខេត្ត និង ៦ ក្រុង ត្រូវបានរួមបញ្ជូលនៅសល់តែ ៣៤ ខេត្តប៉ុណ្ណោះ ដោយបែងចែកជា ២៨ ខេត្ត និង ៦ ក្រុង។ ក្នុងនោះ មានការកែសម្រួលប្រព័ន្ធគ្រប់គ្រងជា ២ ថ្នាក់ គឺខេត្តក្រុង និង សហគមន៍ ដោយលុបចោលថ្នាក់ស្រុក និង ខណ្ឌ ចាប់ពីថ្ងៃទី ១ ខែកក្កដា ឆ្នាំ ២០២៥ តទៅ។
គោលដៅនៃកំណែទម្រង់នេះ គឺដើម្បីបង្កើតប្រព័ន្ធរដ្ឋបាលទំនើប បង្កើនប្រសិទ្ធភាព និងភាពស្និទ្ធស្នាលជាមួយប្រជាជន កាត់បន្ថយភាពស្មុគស្មាញនៃយន្តការរដ្ឋ និង លើកកម្ពស់គុណភាពសេវាសាធារណៈ។ យ៉ាងណាមិញ អគ្គលេខាបក្សកុម្មុយនិស្តវៀតណាម លោក To Lem បានឱ្យដឹងថា ការរួមបញ្ចូលគ្នានេះគឺជា ជំហានយុទ្ធសាស្ត្រជាប្រវត្តិសាស្ត្រ ក្នុងការអភិវឌ្ឍន៍ប្រទេសវៀតណាមនៅក្នុងសម័យថ្មី៕
ប្រភព៖ Khaosod
