តាមរយៈសកម្មភាពរួមការងារជាច្រើនទាំងការថតរឿង និង បទចម្រៀង លោក STEP និង កញ្ញា SK មិនត្រឹមឆក់បានការចាប់អារម្មណ៍ចំពោះដៃគូដ៏ស័ក្តិសមដែលមានទេពកោសល្យសម្ដែងបានយ៉ាងប៉ិនប្រសប់នោះទេ តែថែមទាំងអ្នកទាំងពីរមានភាពគួរឱ្យស្រឡាញ់ និង សមគ្នាខ្លាំង រហូតអ្នកគាំទ្រធ្លាប់ផ្គូរផ្គង់ចង់ឱ្យអ្នកទាំងពីរក្លាយជាគូស្នេហ៍ក្រៅឆាក។
លើសពីនេះ តារាចម្រៀងប្រុស STEP និង ស្រីស្អាតរូបនេះ តែងធ្វើឱ្យអ្នកគាំទ្រចាប់អារម្មណ៍ខ្លាំង ក្រោយពីបានឃើញសកម្មភាពយ៉ាងស្និទ្ធស្នាលជាមួយគ្នា មិនត្រឹមតែក្នុងការងារទេ តែក៏ឃើញសកម្មភាពក្រៅឆាក ទាំងរូបភាព ក៏ដូចជាវីដេអូផ្សេងៗលើបណ្ដាញសង្គម មានកាយវិការផ្អែមល្ហែមលើសពីមិត្តធម្មតា ដែលធ្វើឱ្យអ្នកគាំទ្រគិតថាអ្នកទាំងពីរកំពុងសាងទំនាក់ទំនងស្នេហានឹងគ្នា។
ដ្បិតតែមកទល់ពេលនេះ តារាប្រុសស្រីមួយគូនេះ មិនបានចេញមុខបញ្ជាក់ច្បាស់ៗថាត្រូវជាអ្វីនឹងគ្នាមែន ប៉ុន្តែពីមួយថ្ងៃទៅមួយថ្ងៃ អ្នកទាំងពីរកាន់តែផ្អែមល្ហែម ខណៈឃើញទៅណាមកណាតែងមានវត្តមានជាមួយគ្នាដណ្ដើរគ្នាយ៉ាងត្រសង ទាំងពេលបំពេញការងាររៀងខ្លួន ក៏ឃើញតាមទៅគាំទ្រយកចិត្តទុកដាក់នឹងគ្នា រីឯការដើរកម្សាន្តតាមបណ្ដាខេត្តនានាក៏កម្រឃើញឃ្លាតគ្នាដែរ។
ដោយឡែក មកដល់ថ្មីៗនេះ STEP និង SK បានធ្វើឱ្យមហាជនអ្នកគាំទ្រកាន់តែរំភើប និង ភ្ញាក់ផ្អើល ខណៈបានឃើញវីដេអូសកម្មភាពរបស់តារាចម្រៀងប្រុស STEP និយាយសារភាពត្រង់ៗលើឆាកតន្រ្តីមុខមហាជនជាច្រើនថា រូបលោកបានតាមសុំស្រឡាញ់ SK រយៈពេលជាង ៣ ឆ្នាំមកហើយ គ្រាន់តែមកដល់ពេលនេះ ខាងស្រីមិនទាន់ផ្ដល់ចម្លើយឱ្យលោកច្បាស់នៅឡើយ។ ក្នុងវីដេអូនោះដែរ លោក STEP ក៏បានសុំចម្លើយពី SK ម្ដងទៀតថាអាចរួមដំណើរជីវិតជាមួយគ្នាបានឬទេ ប៉ុន្តែខាងស្រីនៅតែមិនទាន់ឱ្យចម្លើយលោកបានដដែល៕
សូមចុចទីនេះដើម្បីទស្សនាវីដេអូ៖
