កន្លងមក មហាជននិយមតាមដានបណ្តាញសង្គមច្បាស់ជាបានជ្រាបមកហើយ ពីប្អូនស្រីជនភៀសសឹកដែលចេះនិយាយ ៤ ភាសា តាមរយៈការរៀនតាមអនឡាញដោយខ្លួនឯង មានឈ្មោះហៅក្រៅថា Nelly បន្ទាប់ពីអ្នកផលិតមាតិកាល្បីម្ចាស់ Channel Youtube «China Mac Tv» ឈ្មោះ Raymond Yu ហៅ Mac បានទៅជួបរូបនាង និង បង្ហោះវីដេអូនោះ។ លើសពីនោះ លោក Mac ដែលជាអ្នកផលិតមាតិកា និង ជាបុគ្គលដំបូង ដែលធ្វើឱ្យ Nelly ផ្ទុះការចាប់អារម្មណ៍នោះ ក៏បានបង្កើតមូលនិធិស្វែងរកថវិកាជូននាងទៀតផង។
បន្ទាប់ពី វីដេអូរបស់ Mac បានចេញផ្សាយ និង មានការទស្សនាច្រើនទាំងក្នុង និង ក្រៅប្រទេសនោះ ធ្វើឱ្យមហាជន អាណិតស្រឡាញ់ និង សរសើរដល់ Nelly រហូតមានការជួយឧត្ថម្ភជាថវិកា ម៉ូតូ និង ឱ្យនាងបានសិក្សាបន្តដោយឥតគិតថ្លៃថែមទៀតផង។
ងាកទៅកាន់លោក Mac ឯណោះវិញ ក្រោយបានក្លាយទៅជាបុគ្គលដំបូង ដែលជួយឱ្យ Nelly ទទួលបានក្តីអាណិតស្រឡាញ់ពីមហាជនហើយនោះ លោក ក៏នៅតែបន្តរាប់អាន Nelly និង ក្រុមគ្រួសាររបស់ Nelly ដោយលោកតែងតែមកកាន់ប្រទេសកម្ពុជាជាញឹកញាប់។
យ៉ាងណាមិញ ថ្មីៗនេះ អ្នកលេង Tik Tok បាន និង កំពុងចាប់អារម្មណ៍នឹងវីដេអូមួយរបស់លោក Mac ដែលបានឆ្លើយតបទៅនឹងបុគ្គលមួយចំនួន ដែលសម្លឹងមើលមកលោកថា មានទំនាក់ទំនងជាមួយនឹង Nelly។ ក្នុងវីដេអូនោះដែរ លោក Mac បាននិយាយទាំងហួសចិត្តថា ហេតុអ្វីបានទៅជាគិតបែបហ្នឹងទៅវិញ? លោកបានបញ្ជាក់ថា Nelly ទើបតែអាយុ ១៦ ឆ្នាំទេ ហើយបើនិយាយពីវ័យវិញ គឺអ្នកទាំង ២ ប្រៀបដូចជាឪពុក និង កូនយ៉ាងដូច្នោះ។ ម្យ៉ាងវិញទៀត បើនិយាយពីរឿងច្បាប់ទៀត គឺកាន់តែខុសតែម្តង៕
សូមចុចទីនេះ ដើម្បីទស្សនាវីដេអូ៖
