អ្នកនិយមតាមដានវិស័យចម្រៀងរ៉េប ច្បាស់ជាបានដឹងមកហើយពីប្រជាប្រិយភាពរបស់លោក KingChi ដែលចាត់ទុកថាជាតារាចម្រៀងរ៉េបមួយរូបមានប្រជាប្រិយភាពនាពេលបច្ចុប្បន្ន។
មិនត្រឹមតែប៉ុណ្ណោះ ក្រោយសាងកេរ្តិ៍ឈ្មោះល្បីល្បាញ តារាចម្រៀងរ៉េបប្រចាំផលិតកម្ម CG Movement រូបនេះ មានឱកាសក្តោបបានទីផ្សារការងារសិល្បៈជាច្រើន ព្រមទាំងទទួលបានតំណែងជាគ្រូបង្វឹកក្នុងកម្មវិធីប្រកួតចម្រៀងរ៉េបល្បីៗ ដោយកាលពីអំឡុងឆ្នាំ ២០២៣ ជាគ្រូបង្វឹកក្នុងកម្មវិធី «The Rapper Cambodia រដូវកាលទី ១» និង ក្នុងឆ្នាំ ២០២៤ នេះ ជាគ្រូបង្វឹកក្នុងកម្មវិធី «Rapper Fighter» ទៀតផង។
ដោយឡែក ស្របពេលប្រជាប្រិយភាពកំពុងតែទទួលបានការគាំទ្រ ថ្មីៗនេះ លោក KingChi បានធ្វើវីដេអូឆ្លើយតបនឹងអ្នកគាំទ្រ ក្រោយពីមានគេសួរថា៖ «បើពេលនេះ បង KingChi មិនជោគជ័យលើវិស័យ Rapper នេះ តើរាល់ថ្ងៃនេះ បង KingChi គឺជានរណា?»។
ក្នុងនោះដែរ តារាចម្រៀងរ៉េប KingChi បានឆ្លើយតបថា៖ «បើសិនពេលនេះ លោកមិនជោគជ័យក្នុងវិស័យរ៉េប គឺលោកនៅតែជាបុគ្គលិកធ្វើគីមឈី ឱ្យហាងរបស់តារាចម្រៀងរ៉េប ប្រុសឡា ដដែល។ បើមិនដូច្នោះ លោក អាចបង្កើតអាជីវកម្មលក់គីមឈីធំជាងនេះ ឬធ្វើជាអ្នកលក់កាហ្វេ ធ្វើជាអ្នករត់ម៉ូតូឌុប ឬជាគ្រូបង្រៀនក៏ថាបាន»។
ជាងនេះទៅទៀត ចម្លើយចុងក្រោយ KingChi បានឆ្លើយធ្វើឱ្យអ្នកគាំទ្រសរសើរដល់លោកក្នុងនាមជាស្វាមី និង ប៉ាល្អនោះ គឺ KingChi បានឆ្លើយថា៖ «បើលោកមិនជោគជ័យ លោកនៅតែជាប្តីល្អ លោកប៉ាល្អសម្រាប់ភរិយា និង កូនរបស់លោក»៕
សូមចុចទីនេះ ដើម្បីទស្សនាវីដេអូ៖
