បើគិតត្រឹមថ្ងៃទី ១៨ ខែកញ្ញា ឆ្នាំ ២០២៥ នេះ គឺរយៈពេល ១៥ ថ្ងៃមកហើយ នៃដំណើរបេសកកម្មរបស់បវរកញ្ញាដ៏មានប្រជាប្រិយភាព កុយ អេនណា នៃការដើរចាកចេញពីទីក្រុងភ្នំពេញទៅកាន់ខេត្តសៀមរាបក្នុងកម្មវិធីសប្បុរធម៌លើកដំបូងរបស់ខ្លួនក្រោមប្រធានបទ «ដើរដោយក្តីសង្ឃឹម ដើរដើម្បីទេសចរណ៍»បើគិតចាប់តាំងពីថ្ងៃធ្វើដំណើរចាកចេញពីភ្នំពេញកាលពីព្រឹកព្រលឹមថ្ងៃទី ០៤ ខែកញ្ញា ឆ្នាំ ២០២៥ មក។
ក្នុងនោះ ដំណើរថ្មើរជើងនេះ កញ្ញា កុយ អេនណា ធ្វើឡើងក្នុងគោលបំណង ២ គឺ ដើម្បីរៃអង្គាសថវិកាសប្បុរសធម៌ ជួយគាំទ្រដល់ក្មេងៗ ឬជនពិការក្នុងមណ្ឌលខ្វះខាតនៅកម្ពុជា និង ដើម្បីចូលរួមចំណែកផ្សព្វផ្សាយពីការធ្វើដំណើរទេសចរណ៍ពីរាជធានីភ្នំពេញឆ្ពោះទៅកាន់ទឹកដីសៀមរាបប្រមាណជាង ៣០០ គីឡូម៉ែត្រ។
ស្របគ្នាក្នុងការបង្ហាញនូវការសរសើរ និង មោទកភាពយ៉ាងខ្លាំងនៃឆន្ទៈដ៏មោះមុតរបស់ កញ្ញា កុយ អេនណា ដែលជាបវរកញ្ញា និង ស្ត្រីដំបូងគេបានលះបង់កម្លាំងកាយចិត្ត ដើរថ្មើរជើងទៅកាន់ខេត្តសៀមរាប បើទោះជាដឹងថាមានការលំបាកយ៉ាងណាក្តី។ តែយ៉ាងណាក៏ដោយ តាមរយៈការចែករំលែកព័ត៌មានប្រចាំថ្ងៃនៃបេសកកម្មនេះដែរ កញ្ញា កុយ អេនណា បានបង្ហាញក្តីរំភើបយ៉ាងខ្លាំង ខណៈដើរទៅដល់ទីណា មានបងប្អូនប្រជាពលរដ្ឋ អ្នកលក់ដូរ សិស្សានុសិស្ស គ្រូពេទ្យ ព្រះសង្ឃ រង់ចាំស្វាគមន៍ផ្តល់កម្លាំងចិត្តដល់នាង។ លើសពីនោះ ក្នុងការធ្វើដំណើរតាមដងផ្លូវ ក៏មានអ្នកគាំទ្រ និង មិត្តភក្តិក្នុងក្រៅសិល្បៈជាច្រើនបានស្កាត់ទៅផ្តល់កម្លាំងចិត្តដល់ កញ្ញា កុយ អេនណា ផងដែរ។
ជាក់ស្តែងនៅថ្ងៃទី ១៧ ខែកញ្ញា ឆ្នាំ ២០២៥ កន្លងទៅ តារាចម្រៀង អ៊ីណូ និង ក្រុមការងារក៏បានទៅជួបកញ្ញា កុយ អេនណា នៅតាមដងផ្លូវ និង មានរបស់ផ្ញើខ្លះៗជូនដល់បវរកញ្ញាចិត្តធម៌រូបនេះផងដែរ។ លើសពីនោះ ក្រៅពីការកោតសរសើរនូវការលះបង់របស់កញ្ញា កុយ អេនណា ហើយនោះ លោក អ៊ីណូ ក៏បានឱ្យដឹងថា លោកនឹងផលិតបទចម្រៀងជូនដល់កញ្ញា កុយ អេនណា ទៀតផង។
តាមរយៈសំណេរលោក អ៊ីណូ បានរៀបរាប់ថា៖ «ថ្ងៃនេះបានជួបប្អូនស្រី Koy Anna ដើរដោយថ្មើរជើងតាមផ្លូវទៅ ខេត្តសៀមរាប! អរគុណ ឆន្ទៈដ៏មោះមុតរបស់ប្អូនស្រីដើម្បីប្រទេសកម្ពុជា។ បង ENO តំណាងឱ្យ Team Eno និង និពន្ធបទភ្លេងថ្មី ច្រៀងថ្លែងអំណរអរគុណ កោតសរសើរប្អូនស្រី ក្នុងអត្ថន័យខ្មែរស្រលាញ់ខ្មែរ នៃបេះដូងរបស់ប្អូនស្រី ការស្រលាញ់លះបង់គ្រប់បែបយ៉ាង ដើម្បីប្រទេសកម្ពុជាឆាប់ៗនេះ»៕
សូមចុចទីនេះ ដើម្បីទស្សនាវីដេអូ៖
