មកដល់ពេលនេះ លើបណ្ដាញសង្គមមហាជនកម្ពុជា ក៏ដូចជាអ្នកសិល្បៈ និង បុគ្គលល្បីៗជាច្រើន កំពុងបន្តរួបរួមគ្នាជួយជាតិមាតុភូមិតាមរយៈសកម្មភាពសប្បុរសធម៌ផ្សេងៗ ព្រមទាំងបង្ហាញការគោរពអរគុណ និង ដឹងគុណដល់វីរកងទ័ពជួរមុខដែលបានពលីក្នុងសមរភូមិ។
តាមរយៈការចែករំលែកលើបណ្ដាញសង្គម ក្រៅពីបង្ហាញការដឹងគុណ និង ចូលរួមរំលែកទុក្ខជាមួយគ្រួសារវីរកងទ័ពដែលបានពលីជីវិត ឃើញថាក៏មានសប្បុរសជន អ្នកសិល្បៈជាច្រើនបានទៅចូលរួមរំលែកទុក្ខ និង គោរពវិញ្ញាណក្ខន្ធរបស់វីរកងទ័ពដោយផ្ទាល់ ដោយនាំយកជាអំណោយ និង ថវិកាជូនគ្រួសារវីរកងទ័ពដើម្បីសម្រាលជីវភាពផងដែរ។
ក្នុងនោះ ក្រឡេកមើលហ្វេសប៊ុករបស់កំពូលតារាចម្រៀង គឺឧកញ៉ា ខេមរៈ សិរីមន្ត ក៏បានបង្ហាញពីសកម្មភាពដែលលោកបានទៅចូលរួមរំលែកទុក្ខ និង គោរពវិញ្ញាណក្ខន្ធរបស់វីរកងទ័ពមួយរូប នៅខេត្តឧត្តរមានជ័យដោយផ្ទាល់ដែរ។ អ្វីដែលរំជួលចិត្ត ឧកញ៉ា ខេមរៈ សិរីមន្ត បានច្រៀងចម្រៀងមួយបទជូនវីរកងទ័ពលើកចុងក្រោយ តាមការស្នើសុំពីភរិយារបស់វីរកងទ័ពផ្ទាល់ ដែលជាបទចម្រៀងស្វាមីស្រឡាញ់គាត់ចូលចិត្តពេលនៅមានជីវិត ធ្វើឱ្យឧកញ៉ាបកស្រាយចម្រៀងទាំងក្ដីរំជួលចិត្តទប់ទឹកភ្នែកមិនជាប់។
ជាមួយគ្នានោះ ឧកញ៉ា ខេមរៈ សិរីមន្ត ក៏បានសរសេររៀបរាប់ភ្ជាប់ជាមួយវីដេអូថា ៖ «ខ្ញុំមិនមែនទន់ជ្រាយទេ តែខ្ញុំមិនអាចទប់ទឹកភ្នែកទេ ភរិយាបងប្រុសវីរកងទ័ពដែលបានពលីប្រាប់ខ្ញុំថា ប្តីគាត់ស្រឡាញ់ និង ចូលចិត្តបទ «តាមាន់ស្នេហ៍ខ្ញុំ» គាត់ស្នើខ្ញុំឱ្យច្រៀងបទនេះ ព្រោះប្ដីគាត់ចូលចិត្តណាស់ នេះជាទឹកភ្នែកគុណធម៌ បទនេះបានច្រៀង និង និពន្ធពីរខែហើយ បទនេះគឺជាចម្រៀងរបស់កងទ័ពនៅក្នុងអត្ថន័យចម្រៀងទាំងអស់ បញ្ជាក់អំពីការលះបង់របស់កងទ័ពមួយជំហានទៅស្លាប់ក៏មិនអាចឱ្យអូនទៅអ្នកណាបានឡើយ ការបូជាពលីរបស់វីរកងទ័ពរបស់យើងគុណតម្លៃខ្ពស់ពេក សុំបួងសួងដល់វត្ថុស័ក្តិសិទ្ធិទាំងឡាយក្នុងលោកសូមឱ្យវិញ្ញាណក្ខន្ធរបស់បង ដែលបានពលី និង អ៊ំៗពូៗទាំងអស់គ្នា និង វីរកងទ័ពបានទៅដល់ឋានសួគ៌កុំបីអាក់ខានឡើយ»៕
សូមចុចទីនេះដើម្បីទស្សនាវីដេអូ៖
