ស្របពេលសារព័ត៌មានថៃ និង ប្រជាជនថៃកំពុងតែបំភ្លៃការពិតពីការឈ្លានពានរបស់ខ្លួន ដោយទម្លាក់ថាកម្ពុជាជាអ្នកចាប់ផ្តើមមុននោះ ពេលនេះប្រជាជនកម្ពុជាទាំងអស់កំពុងតែបង្ហាញពីការពិតពីកម្ពុជា ដែលត្រូវបានចោរថៃឈ្លានពានទឹកដីតាមរយៈរូបភាពផ្សេងៗគ្នា។
ងាកទៅកាន់អ្នកផលិតមាតិកាល្បីៗរបស់កម្ពុជាឯណោះវិញ ពេលនេះក៏កំពុងតែចាប់ផ្តើមប្រើសំឡេងរបស់ពួកគេ ដើម្បីបង្ហាញការពិតទៅកាន់ពិភពលោកដែរ។ ក្នុងនោះ អ្នកនាង ឡុង ម៉ូនីកា និង ស្វាមី លោក Mike ជនជាតិអាល្លឺម៉ង់ ក៏បានចេញមកបង្ហោះសារបង្ហាញការពិតរបស់កម្ពុជាទៅកាន់ពិភពលោកដែរ។
តាមរយៈវីដេអូ និយាយជាភាសាអាល្លឺម៉ង់ និង មានការបកប្រែជាភាសាអង់គ្លេស និង ខ្មែររបស់ អ្នកនាង ឡុង ម៉ូនីកា និង ស្វាមី បានរៀបរាប់ថា ៖ «មិត្តភក្តិអន្តរជាតិជាទីគោរព! ក្នុងនាមជាជនជាតិខ្មែរ ខ្ញុំចង់ប្រាប់អ្នកពីការពិតខ្លះ! ហេតុអ្វីបានជាកម្ពុជាត្រូវចាប់ផ្តើមសង្គ្រាម នៅពេលដែលយើងបានព្យាយាមដោះស្រាយជម្លោះជាមួយប្រទេសថៃតាមរយៈតុលាការយុត្តិធម៌អន្តរជាតិតាំងពីដើមរៀងមក? ប្រទេសកម្ពុជា បានឆ្លងកាត់សង្គ្រាមរាប់ទសវត្សរ៍ ហើយបច្ចុប្បន្នប្រទេសយើង កំពុងអភិវឌ្ឋន៍គ្រប់វិស័យ។ ចុះហេតុអ្វីបានជាចង់ធ្វើសង្គ្រាមទៀត? កម្ពុជា ធ្លាប់ប្រើការទូតរួចហើយក្នុងអតីតកាល ដើម្បីដោះស្រាយជម្លោះព្រំដែនជាមួយថៃដោយសន្តិវិធី។
នៅដើមឆ្នាំ ១៩៦២ តុលាការ ICJ បានសម្រេចយល់ព្រមលើការបកស្រាយរបស់កម្ពុជាថា ខ្លួនមានការគ្រប់គ្រងស្របច្បាប់លើប្រាសាទព្រះវិហារ ក្នុងតំបន់ព្រំដែនជាមួយប្រទេសថៃ ហើយបានបញ្ជាក់ពីការបកស្រាយនេះម្តងទៀតក្នុងឆ្នាំ ២០១៣ បន្ទាប់ពីជម្លោះកើតឡើងជាថ្មីជុំវិញប្រាសាទព្រះវិហារ។ ទោះជាយ៉ាងណាក៏ដោយ ជម្លោះព្រំដែនបាននៅតែបន្ត រាលដាលទៅកន្លែងផ្សេងទៀត និង ប្រាសាទនៅតាមព្រំដែន។ កាលពីចុងខែឧសភាឆ្នាំនេះ ទាហានខ្មែរម្នាក់បានស្លាប់ក្នុងការបាញ់ប្រហារមួយដោយទាហានថៃនៅខេត្តព្រះវិហារ ហើយជម្លោះលើប្រាសាទផ្សេងៗបានកាន់តែខ្លាំងឡើងតាំងពីពេលនោះមក។
ដូច្នេះហើយ នៅថ្ងៃទី ១៦ ខែមិថុនា ឆ្នាំ ២០២៥ កម្ពុជាបានប្តឹងទៅតុលាការយុត្តិធម៌អន្តរជាតិម្តងទៀត ហើយបានស្នើឱ្យតុលាការយុត្តិធម៌អន្តរជាតិ បំភ្លឺពីស្ថានភាពប្រាសាទតាមន្តធំ ប្រាសាទតាមន្តតូច ប្រាសាទតាក្របី និង តំបន់មុំ ៣។ ទោះយ៉ាងណា ថៃបានប្រកាសថាខ្លួនមិនទទួលស្គាល់យុត្តាធិការរបស់តុលាការយុត្តិធម៌អន្តរជាតិ។ កម្ពុជា ចង់បានសន្តិភាព និង ស្ថេរភាព។ ប៉ុន្តែយើងមិនអាចទទួលយកបានទេ ពេលប្រទេសមួយផ្សេងទៀតព្យាយាមបំភ្លៃការពិត ដោយមធ្យោបាយយោធា ដូច្នេះហើយយើងកំពុងការពារខ្លួនប្រឆាំងនឹងការឈ្លានពានពីភាគីម្ខាងទៀត។
ក្រោយការប្រយុទ្ធគ្នាបានចាប់ផ្តើមកាលពីព្រឹកម្សិលមិញ កម្ពុជាក៏បានអំពាវនាវទៅក្រុមប្រឹក្សាសន្តិសុខអង្គការសហប្រជាជាតិឱ្យដោះស្រាយជម្លោះក្នុងកម្រិតអន្តរជាតិ។ យើងសង្ឃឹមថា ប្រទេសថៃនឹងយល់ព្រមក្នុងការដោះស្រាយជម្លោះតាមរយៈមធ្យោបាយសន្តិវិធី និង ការទូតអន្តរជាតិ។ សូមអរគុណ! #ThailandStartedTheWar #JusticeforCambodia #CambodianeedsPeace #WeWantPeaceNotWar #WhynotICJ»៕
សូមចុចទីនេះ ដើម្បីទស្សនាវីដេអូ៖
