(វីដេអូ) អ្នកផលិតមាតិកាម្នាក់ ខកចិត្តខ្លាំងជាមួយអ្នកលក់ផ្កា ទៀន ធូប ពេលទៅលេងប្រាសាទតាព្រហ្ម នៅតាកែវ

ថ្មីៗនេះ លើបណ្ដាញសង្គមមហាជនអ្នកគាំទ្រដែលនិយមចូលចិត្តមើលមាតិកាវីដេអូថ្មីៗបង្ហោះលើហ្វេសប៊ុក កំពុងផ្ទុះចាប់អារម្មណ៍ខ្លាំង ក្រោយពីបានឃើញអ្នកផលិតមាតិកាវីដេអូវ័យក្មេងម្នាក់ បានរៀបរាប់បង្ហាញការខកចិត្តផង ហាក់ហួសចិត្តផងជាមួយអ្នកលក់ផ្កា ទៀន ធូបមួយចំនួន ពេលរូបគេទៅលេងប្រាសាទតាព្រហ្មនៅខេត្តតាកែវ។

ជុំវិញរឿងនេះដែរ អ្នកផលិតមាតិកាវីដេអូឈ្មោះ SixTy បានរៀបរាប់ក្នុងវីដេអូ Vlog របស់លោក ខណៈបានទៅលេងប្រាសាទតាព្រហ្មខេត្តតាកែវនេះ បានឱ្យដឹងថាពេលលោកទៅដល់ទីតាំងប្រាសាទភ្លាម មានអ្នកលក់ផ្កា ទៀន ធូប ផ្សេងៗសម្រាប់គោរពបូជាព្រះក្នុងប្រាសាទ បានហុចផ្កាឱ្យលោកទាំងដែលលោកពុំបានដឹងខ្លួន និង ទទួលផ្កាហើយមិនអាចប្រកែកបាន គឺតម្រូវឱ្យលោកទិញ ធ្វើឱ្យលោកចំណាយថវិកាអស់ច្រើនជាបន្តបន្ទាប់។

ចំពោះវីដេអូនេះ លោក SixTy បង្ហោះឡើងមានបំណងចែករំលែកចំពោះបទពិសោធថ្មីនេះ ដោយលោកមិនដែលធ្លាប់ជួបពីមុនមក និង ចង់សួរទៅកាន់មហាជនដែលធ្លាប់ទៅលេងទីតាំងប្រាសាទនេះ ធ្លាប់ជួបរឿងដូចរូបលោកដែរឬទេ។ យ៉ាងណាមិញ តាមរយៈការបញ្ចេញមតិរបស់មហាជនអ្នកលេងហ្វេសប៊ុកជាច្រើន បាននាំគ្នាបញ្ចេញមតិប្រាប់ពីបទពិសោធដែលពួកគេធ្លាប់បានទៅជួប និង ទៅលេងទីតាំងមួយនេះ ក៏មិនសូវខុសគ្នាពីរឿងរ៉ាវក្នុងវីដេអូនេះប៉ុន្មានដែរ រហូតមានអ្នកខេត្តតាកែវផ្ទាល់មួយចំនួន មានអារម្មណ៍ខ្មាសអៀនចំពោះសកម្មភាពរបស់អ្នកលក់មួយចំនួននៅទីនោះទៀតផង៕

សូមចុចទីនេះ ដើម្បីទស្សនាវីដេអូ ៖