កាលពីថ្ងៃទី ២៣ ខែមករា ឆ្នាំ ២០២៤ កន្លងទៅ នាយកដ្ឋានសិល្បៈទស្សនីយភាពនៃក្រសួងវប្បធម៌ និង វិចិត្រសិល្បៈ បានរៀបចំកម្មពិធីបើកការសម្ដែងទស្សនីយភាព ល្ខោនបាមោជ្ជទ័យរឿង «កុលាបប៉ៃលិន» ក្រោមអធិបតីភាពដ៏ខ្ពង់ខ្ពស់លោកជំទាវបណ្ឌិតសភាចារ្យ ភឿង សកុណា រដ្ឋមន្រ្តីក្រសួងវប្បធម៌ និង វិចិត្រសិល្ប: នៅសាលសន្និសីទចតុមុខ។
ក្រោយបើកការសម្ដែងទស្សនីយភាព ល្ខោនបាមោជ្ជទ័យរឿង «កុលាបប៉ៃលិន» នេះ នាយកដ្ឋានសិល្បៈទស្សនីយភាព ក៏បានរៀបចំការសម្ដែងដោយផ្ទាល់នៃផ្ទាំងទស្សនីយភាពនេះ ដោយសិល្បករសិល្បការិនីរបស់នាយកដ្ឋានសិល្បៈទស្សនីយភាព ពីថ្ងៃទី ២៣ ដល់ ថ្ងៃទី ២៦ ខែមករា ឆ្នាំ ២០២៥ កន្លងទៅ។
ចំពោះការបើកសម្ដែងរយៈពេល ៤ ថ្ងៃកន្លងទៅនេះ ឃើញថាមានការចូលរួមទស្សនាយ៉ាងច្រើនកុះករពីបងប្អូនមហាជនខ្មែរ បង្ហាញការគាំទ្រខ្លាំងនូវទស្សនីយភាពដ៏អស្ចារ្យនេះ ដែលក្រឡេកមើលបណ្ដាញសង្គមទាំងហ្វេសប៊ុក និង TikTok ផ្ទុះការចាប់អារម្មណ៍ចែករំលែក និង សរសើរខ្លាំងពីការរៀបចំសម្ដែងទម្រង់រឿងល្ខោននេះ ជាពិសេសគឺទេពកោលស្យសម្ដែងរបស់តួអង្គនីមួយៗ។
ក្នុងនោះដែរ មហាជនអ្នកគាំទ្រលើបណ្ដាញសង្គមជាច្រើន ជាពិសេសមហាជនបានទៅចូលរួមទស្សនាដោយផ្ទាល់មានការស្ងើចសរសើរខ្លាំងចំពោះតួប្រុស និង តួស្រី ដែលសុទ្ធតែស្រស់ស្អាតស្រស់សង្ហា រីឯទេពកោសល្យសម្ដែងវិញ គឺសម្ដែងបានល្អខ្លាំង ទាំងការនិយាយ និង កាយវិការសមជាមួយសាច់រឿងឥតខ្ចោះ។ ចំពោះតួអង្គស្រី ឃុន នារី សម្ដែងដោយកញ្ញា កែវ សុផានិត ដែលត្រូវបានគេស្គាល់ថាជាគ្រូល្ខោនយីកេ តារាសម្តែង និង ជាតារាចម្រៀងមួយរូប រីឯតួអង្គប្រុស ចៅចិត្រ សម្ដែងដោយលោក ថេង គឹមស មកពីក្រុមយីកេ និង ជាតារាសម្ដែងផងដែរ។
តួអង្គប្រុសស្រីគូនេះ មិនត្រឹមតែសម្តែងបានសមគ្នានោះទេ សូម្បីតែទឹកដមសំឡេងពេលបង្ហើរសំនៀងម្ដងៗក៏ពីរោះផ្អែមឆ្អិតគួរឱ្យចង់ស្ដាប់ផងដែរ។ លើសពីនេះទៅទៀត អ្វីដែលធ្វើឱ្យមហាជនដក់ជាប់ក្នុងចិត្តចាំមិនភ្លេចនោះ គឺកាយវិការដែលពោរពេញដោយភាពក្រមិចក្រមើម ផ្ដោះម្តងស្នេហាផ្លែផ្កាជាមួយវាចាស្នេហាផ្អែមមុតរបស់តួអង្គទាំងពីរ រឹតតែញ៉ាំងឱ្យរឿងល្ខោនបាមោជ្ជទ័យដែលកប់បាត់ជាង ២០ ឆ្នាំមួយនេះរស់រវើក និង មានភាពស្រស់បំព្រងឡើងវិញ ហើយធ្វើឱ្យមហាជនពេញចិត្តសើចហ៊ោគាំទ្រពេញមហោស្រព៕
