កាលពីរសៀលថ្ងៃទី ០៣ ខែមីនា ឆ្នាំ ២០២៥ នេះ លើបណ្ដាញសង្គមមហាជនអ្នកគាំទ្រ ជាពិសេសអ្នកស្ថិតក្នុងចង្កោមសិល្បៈកំពុងមានការរន្ធត់ចិត្តជាខ្លាំង ក្រោយពីទទួលដំណឹងថាលោក ប៉ែន ចាន់សិទ្ធិ Freshie Boy លេខ ១ ជំនាន់ទី ៨ ឆ្នាំ ២០០៩ បានទទួលមរណភាពហើយ។ នេះបើតាមរយៈការបង្ហោះលើហ្វេសប៊ុករបស់លោក Pitou ThaiNorak ដែលជាមិត្តជិតស្និទ្ធបង្ហោះរៀបរាប់ភ្ជាប់ជាមួយនូវរូបភាពលោក ប៉ែន ចាន់សិទ្ធិ ជាមួយសារយ៉ាងរំជួលចិត្តថា ៖ «សូមប្អូនទៅឱ្យបានសុខ កើតជាតិក្រោយ សូមកុំឱ្យ អភ័ព្វ ដូចជាតិនេះទៀត RIP»។
ក្រោយទទួលបានដំណឹងដ៏សោកសង្រេងនេះដែរ មហាជន ជាពិសេសមិត្តសិល្បករជាច្រើន បានបង្ហាញអារម្មណ៍តក់ស្លុត សោកស្តាយ និង ចូលរួមរំលែកទុក្ខជាបន្តបន្ទាប់នៃការបាត់បង់សិល្បករមួយរូបនេះ។
យ៉ាងណាមិញ មូលហេតុនៃមរណភាពរបស់លោក ប៉ែន ចាន់សិទ្ធិ ក៏ត្រូវបានទម្លាយឱ្យដឹង តាមរយៈអ្នកម្តាយរបស់លោកក្នុងកិច្ចសម្ភាសន៍មួយថា លោក ប៉ែន ចាន់សិទ្ធិ មានជំងឺមហារីក រលាកសួត និង ក្រពោះពោះវៀន ហើយពិធីបុណ្យសពរៀបចំនៅវត្តតាំងក្រសាំងខាងជើង។
ដោយឡែក មហាជនក៏កំពុងចាប់អារម្មណ៍នឹងវីដេអូមួយរបស់ម្ចាស់គណនី Tik Tok មួយឈ្មោះថា ហាយសូ ពេជ្រ ដែលគេដឹងថា ជាបុគ្គលស្និទ្ធស្នាលខ្លាំងជាមួយលោក ប៉ែន ចាន់សិទ្ធិ បានបង្ហោះវីដេអូពេលកំពុងធ្វើដំណើរទៅកាន់បុណ្យសព លោក ប៉ែន ចាន់សិទ្ធិ នឹងព្រលយពាក្យជាច្រើន ទំនងដូចជាចង់លើកឡើងពេលលោក ប៉ែន ចាន់សិទ្ធិ នៅមានជីវិត តែមិនសូវមានអ្នកអើពើ។
ម្ចាស់គណនី Tik Tok ហាយសូ ពេជ្រ បានរៀបរាប់ថា៖ «កំពុងធ្វើដំណើរទៅបុណ្យ សិទ្ធិ ហើយចង់ផ្តាំអ្នកទាំងអស់គ្នាថែរក្សាសុខភាពទាំងអស់គ្នា ជាពិសេស ថែរក្សាមនុស្សនៅចំពោះមុខ ពេលគ្នាអត់ឃ្លាន គ្មានស៊ី គ្នាឆាតទៅសុំអីទៅអី មើលធ្វើទៅបុណ្យហ្នឹង កុំសូវរើសពេលវេលា រើសទីកន្លែងពេក ពេលគ្នាសុំតិចតួចឱ្យគ្នាស៊ីទៅ កុំពេលគ្នាស្លាប់បាត់ហើយ កុំនាំគ្នាធ្វើស្តាយចេះ ស្តាយចុះ ស្តាយបានការអី បើមនុស្សទៅបាត់ហើយហ្នឹង…»៕
សូមចុចទីនេះ ដើម្បីទស្សនាវីដេអូ៖
