នៅថ្ងៃទី ២៦ ខែមីនា ឆ្នាំ ២០២៥ នេះ លើបណ្ដាញសង្គមមហាជនអ្នកគាំទ្ររបស់ពិធីការិនីល្បីឈ្មោះ សុភ័ក្ត្រ កុសុម៉ា បានផ្ទុះចាប់អារម្មណ៍ និង បង្ហាញក្ដីបារម្ភខ្លាំងចំពោះអ្នកនាង ក្រោយពីបានឃើញបង្ហោះសារ និង រូបភាពបង្ហាញស្ថានភាពរបស់អ្នកនាងបានសម្រាកព្យាបាលនៅមន្ទីរពេទ្យនៅខេត្តព្រះសីហនុ ដោយសារតែពុលចំណីធ្វើទុក្ខធ្ងន់ធ្ងរ។
សារនោះ សុភ័ក្រ្ត សុកុម៉ា បានបង្ហោះរៀបរាប់ថា ៖ «ដំបូងឡើយនាងខ្ញុំគិតថាមិនចង់សរសេរផុសករណីនេះទេ ប៉ុន្តែគិតឡើងវិញ នាងខ្ញុំពិតជាបារម្ភជំនួសបងប្អូនដែលបានទៅលេងកំពង់សោម ហើយចូលចិត្តញ៉ាំក្តាមប្រៃក្រឡុកល្បី ដោយសារតែកាលពីថ្ងៃទី ២២ ប្អូនប្រុសរបស់ខ្ញុំបានទិញក្តាមប្រៃយកមកញ៉ាំជាមួយក្រុមការងារក្រុមតន្រ្តី ៤ ម៉ោង ក្រោយមកនាងខ្ញុំ និង ប្អូនៗក្រុមការងារ ប្រហែល ៥ នាក់ បានធ្វើទុក រាគ ក្អួត មិនក្រោម ១០ ដង វិលមុខ អស់កម្លាំង ថប់ដង្ហើមក្តៅខ្លួន បណ្តាលឱ្យចូលពេទ្យវេលាម៉ោង ៤ ទាបភ្លឺ មូលហេតុគឺពុលក្តាម ដោយការលាងសម្អាតមិនបានល្អ ពួកខ្ញុំចូលពេទ្យដល់ទៅ ២ ដង ទើបធូរ។ សំណេរមួយនេះ គ្រាន់តែចង់ឱ្យ បងប្អូនមានការប្រុងប្រយ័ត្នមុនញ៉ាំក្តាមប្រៃ កុំឱ្យមានបញ្ហាដូចក្រុមនាងខ្ញុំ នេះពួកខ្ញុំទៅពេទ្យទាន់ពេល មានលទ្ធភាពព្យាបាល ចុះបើមិនទាន់ខ្វះថវិកា ឬមិនបានដឹងថាពុល តើពួកខ្ញុំនឹងទៅជាយ៉ាងណា? សរុបមកនាងខ្ញុំសូមផ្តាំផ្ញើទៅបងៗអាជីវករមួយចំនួនសូមពង្រឹងជាមួយគុណភាព អនាម័យជាមុនសិនមុនលក់ជូនអតិថិជន ព្រោះថាសុខភាព គឺសំខាន់ណាស់ ដែលលុយមិនអាចទិញបានទេ។ ជាចុងក្រោយ សូមអរគុណបងប្អូនដែលបានបារម្ភសួរសុខទុក្ខក្រុមការងារ និង នាងខ្ញុំ ហើយក៏សូមអរគុណដល់លោកគ្រូអ្នកគ្រូពេទ្យទាំង ២ កន្លែង ដែលបានយកចិត្តទុកដាក់ក្នុងការមើលថែអ្នកជំងឺយ៉ាងដិតដល់ #ពុលក្តាមប្រៃ»។
យ៉ាងណាមិញ បន្ទាប់ពីបង្ហាញក្ដីបារម្ភខ្លាំង អ្វីដែលធ្វើឱ្យអ្នកគាំទ្រកាន់តែអាណិត និង សរសើរចំពោះ ពិធីការិនីរូបនេះ ក្រោយពីបានឃើញសកម្មភាពរបស់នាង ខណៈកំពុងធ្លាក់ខ្លួនធ្ងន់ដោយសារពុលចំណីនេះមែន ប៉ុន្តែដោយសារត្រូវបំពេញការងារជាមួយក្រុមតន្រ្តីនៅខេត្តព្រះសីហនុនោះ សុភ័ក្រ្ត កុសុម៉ា ខំស៊ូធ្វើការជាពិធីការិនីក្នុងកម្មវិធីមង្គលទាំងខ្លួនឈឺ ឈរមិនចង់ជាប់ និង មានអាការៈក្អួតចង្អោររហូត ប៉ុន្តែនាងនៅតែស៊ូរហូតចប់កម្មវិធី ទើបអាចចូលសម្រាកនៅមន្ទីរពេទ្យម្ដងទៀត។
ជាមួយគ្នានោះដែរ សុភ័ក្រ្ត កុសុម៉ា បានសរសេររៀបរាប់ថា ៖ «ខ្ញុំតែងតែប្រាប់ខ្លួនឯងថា នៅលើឆាកទស្សនិកជនគាត់មិនដឹងថាយើងមានបញ្ហាអ្វី ជួបរឿងអ្វី ពិបាកចិត្តរឿងអ្វីនោះទេ ដូច្នេះនៅលើឆាកត្រូវប្រឹងសម្តែងអស់ពីសមត្ថភាព ព្រោះបើពួកគាត់ឃើញយើងម្តងជាពីរដងដែលមិនមែនជាខ្លួនយើង នោះពួកគាត់នឹងឈប់មើលយើង ហើយអ្វីដែលមិនអាចគេចវេសបានទៀតនោះគឺ ទំនួលខុសត្រូវខ្ពស់បំផុត»៕
សូមទស្សនាវីដេអូខាងក្រោម៖
