ក្រោយពីដំណើរការនៃការជ្រើសរើសបេក្ខភាព Miss Cosmo Cambodia 2025 បានចាប់ផ្តើមហើយនោះ កាលពីថ្ងៃទី ១៣ ខែមីនា ឆ្នាំ ២០២៥ កន្លងទៅនេះ ស្ថាប័នបវរកញ្ញាខាងលើ បានរៀបចំកម្មវិធីបំពាក់ឈៀងជូនបេក្ខភាព ដែលបានចូលរួមរួចហើយដែរ។
ក្នុងនោះ បេក្ខភាពផ្លូវការនៃការប្រកួត Miss Cosmo Cambodia 2025 គឺមានសរុបចំនួន ២៥ នាក់ ដោយសុទ្ធសឹងតែ ជាបេក្ខនារីស្រស់សោភា និង ខ្លះក៏ជាបវរកញ្ញាធ្លាប់មានតំណែងរួចហើយដែរ។
យ៉ាងណាមិញ ក្រឡេកទៅមើលម្ចាស់មកុដ Miss Cosmo Cambodia 2025 និង ជា Top Miss Cosmo 2025 កញ្ញា អ៊ិន លក្ខិណា ក៏បានបង្ហាញអារម្មណ៍រំភើបចិត្តទៅកាន់បេក្ខជនទាំង ២៥ រូប នៃដំណើរប្រកួតទៅយកមកុដ Miss Cosmo Cambodia 2025 ដូចគ្នាដែរ ក្នុងនាមជារៀមច្បងលើតំណែង Miss Cosmo Cambodia 2024។
ម្យ៉ាងវិញទៀត ងាកទៅកាន់ការចូលរួមប្រកួតរបស់ កញ្ញា ប៊ី សុធារី វិញ កញ្ញា អ៊ិន លក្ខិណា ក៏បានបង្ហាញចំណាប់អារម្មណ៍ដូចគ្នាដែរថា៖ «បើសិនជាគាត់ (ប៊ី សុធារី) មានសមត្ថភាព ហើយយល់ច្បាស់ថាកម្មវិធីចង់បានអី គាត់នឹងទទួលបានមកុដ! ហើយអ្វីដែលសំខាន់ ខ្ញុំឃើញគាត់ថាជាមនុស្សដែលតស៊ូ ដូចបងប្អូនទាំងអស់គ្នាបានដឹងចឹង គាត់បានឈ្នះចិត្តប្រជាជនយើងបានច្រើន គាត់បានជួបរឿងរ៉ាវជាច្រើន ខ្ញុំគ្មានអ្វីច្រើនទេ ខ្ញុំជូនពរគាត់ឱ្យទទួលបានជោគជ័យលើវេទិកានេះ»៕
សូមចុចទីនេះ ដើម្បីទស្សនាវីដេអូ៖
