ចំពោះតារាចម្រៀងស្រីល្បីឈ្មោះសំឡេងស្រួយស្រេសដូចសារិកាកញ្ញា សុខ ពិសី មកដល់បច្ចុប្បន្ននៅតែជាប់ឈ្មោះជាកំពូលតារាចម្រៀងស្រី ដែលរក្សាបានប្រជាប្រិយភាពខ្លាំងដដែល ដោយទទួលបានក្ដីស្រឡាញ់គាំទ្រពីមហាជនគ្រប់ស្រទាប់។
លើសពីនេះ មិនត្រឹមតែរក្សាក្ដីស្រឡាញ់ក្នុងចិត្តអ្នកគាំទ្រនោះទេ កញ្ញា សុខ ពិសី ក៏កាន់តែក្ដោបបានទីផ្សារដ៏ពេញនិយមក្នុងវិស័យចម្រៀងបច្ចុប្បន្ន ដែលកំពុងមមាញឹកចេញច្រៀងតាមភោជនីដ្ឋានឯកជនដូចជា Pub, Club មិនដែលដាច់ឡើយ។
ក្រៅពីជីវិតសិល្បៈ បើងាកចាប់អារម្មណ៍លើជីវិតឯកជនរបស់តារាចម្រៀង សុខ ពិសី វិញ អាចចាត់ទុកជាតារាស្រីមានជីវិតជោគជ័យហាយសូរមិនធម្មតាដែរ រីឯរូបសម្រស់វិញ ចូលវ័យ ៣៥ ឆ្នាំហើយ នាងមិនត្រឹមតែមិនផ្លាស់ប្ដូរជ្រេតាមវ័យនោះទេ ថែមទាំងកាន់តែស្រស់ស្អាតសាច់ឈាមស្រស់ថ្លាក្មេងខ្ញង់ឡើងពីមួយថ្ងៃទៅមួយថ្ងៃ ដែលតែងឆក់បានការសរសើរពីមហាជន។
ដោយឡែក ទាក់ទងនឹងរឿងរ៉ាវជីវិតស្នេហាវិញ តារាចម្រៀងស្រីរូបនេះ ទោះវ័យរាងជ្រេមែន ក៏មិនដែលឃើញនាងខ្វល់ខ្វាយរឿងរកគូស្រករ សាងជីវិតគ្រួសារដូចគេដែរ ដោយឃើញតែផ្ដោតលើការងារសិល្បៈ និង ថែសម្រស់កាន់តែក្មេងជាងវ័យប៉ុណ្ណោះ។
ជាក់ស្ដែង និយាយដល់រឿងជីវិតគូ ថ្មីៗនេះ កញ្ញា សុខ ពិសី បានធ្វើឱ្យមហាជនអ្នកគាំទ្រអស់ចម្ងល់ ក្រោយឃើញក្នុងវីដេអូមួយមានអ្នកគាំទ្រសួរនាំរឿងថ្ងៃណានាងយកស្វាមី ស្រាប់តែតារាចម្រៀងស្រីរូបនេះ ឆ្លើយតបយ៉ាងខ្លីទៅវិញ ដែលនាងថារឿងប្ដីសី គឺមិនមែនជាបញ្ហាធ្វើឱ្យនាងជ្រួលជ្រើមគិតគូដែលមិនអាចខ្វះបាននោះទេ ព្រោះនាងគិតថា គឺវាអត់សំខាន់ទៀតផង៕
សូមចុចទីនេះដើម្បីទស្សនាវីដេអូ៖
