ពិតណាស់ នៅថ្ងៃទី ៨ ខែឧសភា ឆ្នាំ ២០២៥ នេះ មហាជនអ្នកគាំទ្រលើបណ្ដាញសង្គមជាច្រើនកំពុងចាប់អារម្មណ៍តាមដានកម្មវិធីសិរីមង្គលរបស់តារាចម្រៀងស្រី រ៉ាប៊ី និង លោក Nick Taylor ដែលបានរៀបចំកម្មវិធីយ៉ាងធំដំអធិកអធម។
ក្រឡេកមើលទិដ្ឋភាពនៃកម្មពិធីបែបប្រពៃណីពេលព្រឹក និង ពេលថ្ងៃក្នុងថ្ងៃមង្គលនេះដែរ ឃើញថាបានរៀបចំឡើងយ៉ាងប្រណីត រីឯកូនកំលោះកូនក្រមុំក៏ស្រស់ស្អាតសង្ហាស័ក្តិសមគ្នាខ្លាំង ដែលមានការចូលរួមអបអរ និង ជូនពរពីបងប្អូន មិត្តភក្តិទាំងក្នុង និង ក្រៅសិល្បៈយ៉ាងច្រើនកុះករ។
ដោយឡែក ងាកទៅចាប់អារម្មណ៍ពីកម្មពិធីប្រពៃណីសែនចងដៃនៃមង្គលការដ៏ធំនេះ ក៏កំពុងផ្ទុះការចាប់អារម្មណ៍ចែករំលែកខ្លាំង ខណៈបានឃើញឪពុកម្ដាយទាំងសងខាងរបស់កូនកំលោះកូនក្រមុំ បានចូលចងដៃកូនប្រុសស្រី និង ឱ្យពរសិរីសួស្ដីដល់កូន ព្រមទាំងចងដៃកូនៗទាំងពីរជាលុយសុទ្ធទាំងដុំៗរាប់ម៉ឺនដុល្លារ ព្រមទាំងមានជាខ្សែកពេជ្រជូនកូនស្រីយ៉ាងប្រណីតទៀតផង៕
