មហាជន ច្បាស់ជាបានស្គាល់មកហើយនូវវេជ្ជបណ្ឌិត ហ៊ាង រតនា ឯកទេសផ្នែកកុមារ ដែលមានឈ្មោះបោះសំឡេងនៅលើបណ្តាញសង្គមហ្វេសប៊ុក។
ក្នុងនោះដែរ ជារឿយៗ វេជ្ជបណ្ឌិត ហ៊ាង រតនា ក៏តែងតែចែករំលែកនូវចំណេះទូទៅផ្នែកសុខភាព ជូនដល់មហាជន និង ជួយការងារសង្គមផ្សេងៗជាច្រើន រហូតទទួលបានការចូលចិត្តស្រឡាញ់ពីមហាជនផងដែរ។
ដោយឡែក នៅព្រឹកថ្ងៃទី ១០ ខែមីនា ឆ្នាំ ២០២៥ កន្លងទៅនេះ អ្នកគាំទ្រ វេជ្ជបណ្ឌិត ហ៊ាង រតនា បានចូលរួមអបអរសាទរដល់លោក ក្រោយពីលោកបានបង្ហោះវីដេអូ និង សារអមដំណឹងមង្គលការរបស់លោក ដែលនឹងរៀបចំនៅថ្ងៃទី ៨ ខែមេសា ឆ្នាំ ២០២៥ ខាងមុខនេះ។
លោកវេជ្ជបណ្ឌិត ហ៊ាង រតនា បានរៀបរាប់ថា ៖ «ពួកខ្ញុំនឹងរៀបអាពាហ៍ពិពាហ៍នៅថ្ងៃទី ០៨-០៤-២០២៥ ខាងមុននេះហើយ នៅទីរួមខេត្តកំពង់ស្ពឺ។ ពួកខ្ញុំមិនបានធ្វើពិធីធំដុំ និង ច្រើនតុនោះទេ។ សារនេះជាដំណឹងជូនដល់បងប្អូន ញាតិមិត្ត និង អ្នករាប់អានពួកខ្ញុំទាំងអស់។ ចំពោះខ្ញុំផ្ទាល់ ប្រហែលជាមិនបានអញ្ជើញ មិត្តភក្តិ បងប្អូន និង អ្នករាប់អានខ្ញុំទេ ដោយហេតុផល ខ្លាចចិត្ត និង ខ្លាចផ្តល់ការរំខានដល់បងប្អូន។ តែបើបងប្អូនអ្នកដែលរាប់អាន និង ស្គាល់ខ្ញុំទាំងអស់នៅថ្ងៃនោះមានពេលទំនេរ សូមបងប្អូនអញ្ជើញចូលរួមជួយផ្តល់កិត្តិយសដល់រូបខ្ញុំបាទផង។ ដោយក្តីគោរព និងរាប់អានដ៏ជ្រាលជ្រៅពីខ្ញុំបាទ ហ៊ាង រតនា និង ភរិយា ហាន ប៊ុនដាណេ»៕
សូមចុចទីនេះ ដើម្បីទស្សនាវីដេអូ៖
