នៅរាត្រីថ្ងៃទី ២០ ខែវិច្ឆិកា ឆ្នាំ ២០២៤ កម្មវិធីប្រកួតសម្រស់ Miss Global Cambodia 2024 បានប្រកាសរកឃើញរាជិនីគ្រងមកុដហើយ គឺបានទៅលើកញ្ញា ខុន ស្រីខួច ជាបេក្ខនារីតំណាងឱ្យខេត្តបាត់ដំបង។
Miss Global Cambodia 2024 កញ្ញា ខុន ស្រីខួច មានទាំងសមត្ថភាព រូបសម្រស់ និង ចំណេះដឹង លេចធ្លោខ្លាំង ដែលចំណុចទាំងអស់នេះហើយ ទើបធ្វើឱ្យ ស្រីខួច អាចយកឈ្នះចិត្តគណៈកម្មការ ក៏ដូចជាទស្សនិកជន រហូតក្លាយជាម្ចាស់មកុដ Miss Global Cambodia ថ្មីប្រចាំឆ្នាំ ២០២៤ ហើយកញ្ញាក៏ត្រៀមខ្លួនតំណាងឱ្យប្រទេសកម្ពុជាទៅប្រកួតលើឆាកអន្តរជាតិផងដែរ។
បន្ទាប់ពីកម្មវិធីប្រកួតសម្រស់មួយនេះ ប្រកាសនូវរាជិនីគ្រងមកុដថ្មីដែលបានទៅលើបវរកញ្ញា ខុន ស្រីខួច ក្នុងនោះគេក៏បានឃើញ លោក អ៊ិន សុភិន បានចេញមុខផុសសារអបអរសាទរដល់នាង ហើយលោកថែមទាំងបានបញ្ជាក់ថា Miss Global Cambodia ថ្មីនេះ គឺត្រូវជាក្មួយស្រីបង្កើតរបស់លោកថែមទៀតផង។
យ៉ាងណាមិញ បើតាមព័ត៌មានចុះផ្សាយកន្លងមកបានឱ្យដឹងថា កម្ពុជានឹងធ្វើជាម្ចាស់ផ្ទះកម្មវិធីប្រកួតសម្រស់ Miss Global Cambodia 2024 ក្រោមការរៀបចំរបស់ក្រុមហ៊ុនមហាហង្ស ដែលមានលោក អ៊ិន សុភិន ជានាយកប្រតិបត្តិ៕
